Istiqbolli loyihalar milliy agentligiga “Hamster Kombat” o‘yini va uning “HMSTR” kripto-aktivi bilan bog‘liq ko‘plab savollar kelib tushmoqda.
Xususan, o‘zbekistonliklar ushbu turdagi o‘yinlar uchun listing jarayonidan o‘tgan kripto-aktivlarni qonuniy ravishda sotib olishi yoki sotishi mumkinmi, fuqarolar ushbu kripto-aktivlar bilan qanday va qayerda operatsiyalarni amalga oshirishi mumkinligi va hokazo.
Istiqbolli loyihalar milliy agentligi quyida eng ko‘p beriladigan savollarga javob berdi.
1
“HMSTR” kripto-aktivmi?
Internetdagi ochiq manbalardan (rasmiy veb-sayt, “White Paper” deklaratsiyasi, ijtimoiy tarmoqlardagi loyiha profillari, Telegram messenjeri va boshqa resurslar) olingan ma’lumotlarga asoslanib, “The Hamster Foundation” — loyiha tashkilotchilari “TON” ekotizimi (tarqatilgan ma’lumotlar reyestri) doirasida “Hamster Kombat” o‘yinining “web3” o‘yinchilari uchun “Airdrop” jarayonini amalga oshirish uchun HMSTR tokenining chiqarilishini e’lon qilishdi.
Shu bilan birga, “coinmarketcap.com” axborot resursi ma’lumotlariga ko‘ra, ushbu tokenga “Yagona kripto-aktiv identifikatori” (UCID) — № 32195 berilgan hamda mazkur token listingini amalga oshirishni rejalashtirgan elektron platformalar haqida ham ma’lumot taqdim etilgan.
2
“HMSTR” tokenining listingi qachon rejalashtirilgan?
Ushbu tokenning xalqaro kripto-platformalarda ro‘yxatga olinishining aniq sanasi bo‘yicha savollar loyiha tashkilotchilariga yuborilishi kerak.
3
“HMSTR” tokenlarini O‘zbekistonning qayerida qonuniy ravishda sotishi mumkin?
Qabul qilingan “HMSTR” tokenlarini faqat kripto-aktivlar aylanmasi sohasidagi milliy xizmat ko‘rsatuvchi provayderlar orqali, agar ular kripto-birja kotirovka ro‘yxatiga yoki kripto-do‘konning savdo savatiga kiritilgan bo‘lsa, xarid qilish yoki sotish mumkin bo‘ladi.
Shu bilan birga, eslatib o‘tamiz: ushbu turdagi tokenlar juda o‘zgaruvchan bo‘lib, aksariyat hollarda foydali funksionalligi yo‘qligi sababli ro‘yxatga kiritilgandan so‘ng qisqa vaqt ichida qadrsizlanadi.
4
Token va listing jarayoni amalga oshiriladigan kripto-platformalar haqida to‘liq ma’lumotni qayerdan olish mumkin?
“HMSTR” tokeniga oid ma’lumotlarni loyihaning rasmiy veb-saytida, “White Paper” deklaratsiyasida, ijtimoiy tarmoqlar va “Telegram” messenjeridagi loyiha profillari, “coinmarketcap.com” axborot resursida va boshqa manbalarda olish mumkin.
Shuningdek, fuqarolardan hushyor bo‘lishlari loyiha bo‘yicha norasmiy ma’lumotlar manbalari orqali olingan ma’lumotlarga ishonmasliklari, ushbu tokenlarni xarid qilish/sotish bo‘yicha o‘z xizmatlarini taklif qilayotgan shaxslarga ishonmasliklari hamda turli firibgarlik sxemalari qurboni bo‘lmaslik so‘raladi.
5
O‘zbekistonda “HMSTR” tokenini noqonuniy xarid qilish/sotish uchun javobgarlik bormi?
O‘zbekiston hududida kripto-aktivning turi yoki nomidan qat’i nazar, kripto-aktivlar aylanmasi sohasidagi qonun hujjatlarini buzganlik uchun qonunchilik darajasida ma’muriy va jinoiy javobgarlik choralari belgilanadi.
Hamster haqida
“Hamster Kombat” joriy yilning 26-mart kuni “Telegram"da ishga tushirildi. U ishlab chiquvchilar tomonidan ekranga bosish va boshqa vazifalarni bajarish (tap-to-earn) orqali virtual tangalarni “qazib olish” o‘yini sifatida tavsiflanadi.
“The Bell” nashri ishlab chiquvchilar bilan tanish bo‘lgan odamlarga tayanib, rossiyalik IT-biznesmen Eduard Gurinovichning “Hamster Kombat” yaratishdagi ishtiroki haqida yozadi. U “CarPrice” avtomobil sotish platformasi va “CarMoney” avtomobillarni garovga olish asosida qarz berish kompaniyasiga asos solgan.
Istiqbolli loyihalar milliy agentligi bu o‘yin kripto-aktiv bo‘lishi uchun blokcheyn texnologiyasi, uning qiymati va egasi bo‘lishi kerakligini qayd etdi. Shundagina u mulkiy huquqqa tenglashtirilishi mumkin.
“Telegram” asoschisi Pavel Durov iyul oyi boshida “Hamster Kombat"ni tarixdagi eng tez rivojlanayotgan servislardan biri deb atagandi. Ishga tushganidan keyin uch oy ichida deyarli 240 mln foydalanuvchi o‘yinga ulangan.
“Hamster Kombat” jamoasi 26-sentabr kuni “HMSTR” tokenining ro‘yxatga olinishini e’lon qildi. “OKX” kripto-birjasi birinchi bo‘lib yangi aktiv bilan savdoni boshlash rejalarini e’lon qildi, keyin “Bybit”, “Bitget”, “Bitfinex” va “Binance” qo‘shildi.
Ikkinchisi 19-sentabrdan boshlab “Launchpool” oldindan kirish token platformasida “HMSTR” farmingni ishga tushirishga va’da berdi. Shuningdek, o‘yin aktivini qo‘llab-quvvatlash “Telegram Wallet” xizmatida paydo bo‘ladi.
Avvalroq ekspertlar O‘zbekistonda “Toncoin"ning ishga tushirilishi mahalliy kripto-aktivlar bozoriga qanday ta’sir qilishi haqida munosabat bildirgandi.
