“O‘zbekneftgaz” tovar-xom ashyo birjasiga AI-92 benzinini taklif qila boshladi, deya xabar berdi davlat kompaniyasi matbuot xizmati.
Buxoro neftni qayta ishlash zavodida AI-92 benzini narxini bosqichma-bosqich pasaytirish ishlari olib borilmoqda.
Bu “yoqilg‘i bozori barqarorligini qo‘llab-quvvatlash va mamlakat aholisi uchun yuqori oktanli benzin mahsulotlari mavjudligini oshirishga qaratilgan” strategiyaning bir qismi bo‘ldi, deb ta’kidladi “O‘zbekneftgaz”.
Strategiya ishlab chiqarish jarayonlarini optimallashtirish va xarajatlarni kamaytirishni o‘z ichiga oladi.
Natijada, bu yuqori sifatli benzin ishlab chiqarishning barqaror hajmini saqlab turishi va uning tannarxini pasaytirishi kerak.
“Bugundan (23-oktabr — „Spot“ eslatmasi) AI-92 benzinini birja savdolari orqali sotish boshlandi, bu esa raqobatbardosh narxlarni belgilash va yoqilg‘i taqsimlash tizimida shaffoflikni oshirish imkonini beradi. Ushbu chora yakuniy iste’molchilar uchun yanada qulay narxlarni ta’minlash orqali bozorga ijobiy ta’sir ko‘rsatishi kutilmoqda”, — deyiladi kompaniya xabarida.
“O‘zbekneftgaz” yuqori oktanli yoqilg‘i narxini bosqichma-bosqich pasaytirish strategiyasiga amal qilishga va’da bermoqda.
Hozirda Buxoro neftni qayta ishlash zavodida AI-92 narxi bir tonna uchun 11 mln 538 ming 428 so‘mni, neft bazalarida esa 11 mln 789 ming 678 so‘mni tashkil etadi.
Avvalroq “Spot” “Gazprom neft” O‘zbekistonda yoqilg‘i quyish shoxobchalari tarmog‘ini qurishi mumkinligi haqida yozgandi.
