Saudiya Arabistoni Ar-Riyodda “AtkinsRéalis” kompaniyasi tomonidan loyihalashtirilgan 400 metr kubik Muqaab osmono‘par binosi qurilishi boshlandi. Bu haqda “Dezeen” nashri xabar berdi.
Poytaxt shimoli-g‘arbidagi 19 kvadrat kilometrlik yangi Murabba tumanining markaziy qismi sifatida loyihalashtirilgan Muqaab rasman qurilmoqda va hozirda qazish ishlari olib borilmoqda, deydi ishlab chiqaruvchi.
Saudiya Arabistonining Markaziy davlat investitsiya jamg‘armasi (PIF) tomonidan moliyalashtiriladigan “New Murabba Development Company” kompaniyasining aytishicha, hozirda hududda qazish ishlari 86%ga yakunlangan.
“AtkinsRéalis” tomonidan ishlab chiqilgan Muqaab osmono‘par binosi 400 metr uzunlikdagi qovurg‘ali kub shaklida bo‘ladi.
Kubning ichida ulkan, deyarli to‘liq balandlikdagi atrium bo‘ladi, uning markazida spiral minora quriladi. Minora atrofida 2 mln kvadrat metrda do‘konlar, madaniy va sayyohlik joylari joylashadi.
Kub Najdiyning zamonaviy me’moriy uslubiga ishora qiluvchi uchburchak shakllardan iborat o‘ziga xos qovurg‘alar bilan o‘raladi.
Qurilish tugallangach, Muqaab Saudiya poytaxtining yangi biznes markazi sifatida yaratilayotgan yangi Murabba hududining markazida bo‘ladi.
Muqaab hozirgacha qurilgan eng katta bino bo‘ladi. “Bloomberg” nashri uni “dunyodagi eng katta qurilish” deb atadi. U dunyodagi eng katta bino nomini AQShdagi “Boeing Everett” zavodidan oladi.
Ishlab chiquvchilarning ta’kidlashicha, yangi Murabbada 100 mingdan ortiq uy, 980 ming kvadrat metr chakana savdo, 1,4 mln kvadrat metr ofis maydoni, shuningdek, mehmonxonalar, madaniy maskanlar, universitet, immersiv teatr va “ramziy” muzey bo‘ladi.
Loyiha Davlat investitsiyalari jamg‘armasi tomonidan moliyalashtiriladigan mamlakat iqtisodiyotini diversifikatsiya qilish bo‘yicha “Vision 2030” strategiyasi doirasida 2030-yilgacha yakunlanishi rejalashtirilgan.
Avvalroq “Spot” Saudiya Arabistonida $500 mlrdlik tog‘-chang‘i kurorti qurilayotgani haqida yozgandi.
Qurilish ishlari 2026-yilga qadar yakunlanishi va 2029-yilda qishki Osiyo o‘yinlari bo‘lib o‘tishi rejalashtirilgan.
