Moskvada 2025-yildan boshlab migrantlar uchun elektron identifikatorlar tajriba tarzida joriy etiladi, deya xabar berdi “TACC” agentligi poytaxt meri Sergey Sobyaninga tayanib.
“Muhojirlar uchun biz kelgusi yildan boshlab federal qonun asosida tajriba tariqasida elektron pasportni kiritamiz”, dedi Sobyanin.
Bunday hujjatda chet ellik haqidagi barcha ma’lumotlar bo‘ladi: kelgan sana, biometrik ma’lumotlar, ish joyi, yashash uchun ruxsatnoma, ro‘yxatdan o‘tish.
Hujjatda nosozlik bo‘lsa, politsiyachi migrantga nisbatan tegishli choralar ko‘rishi shart bo‘ladi.
Sobyaninning qo‘shimcha qilishicha, kelgusi yildan boshlab tajriba doirasida Moskva aviatsiya markazida hatto Rossiyaga kirish vizasiga muhtoj bo‘lmagan chet elliklar uchun ham biometrik nazorat joriy etiladi.
“Moskvaga kelgandan so‘ng, vizasiz mamlakatlardan kelgan fuqarolar biometrik nazoratdan o‘tadilar — fotosuratlar, barmoq izlari. Buning uchun bunday tajribani o‘tkazish imkoniyati to‘g‘risida federal qonun qabul qilindi. Endi prezidentning topshirig‘i bilan hukumatda tegishli qaror ko‘rib chiqilmoqda<...>, bu bizga ushbu tajribani Federal xavfsizlik xizmati, chegara xizmati, ichki ishlar vazirligi va boshqalar bilan birgalikda o‘tkazish vakolatini beradi”, dedi u.
Shahar merining fikricha, Rossiyaga tashrif buyurgan barcha fuqarolarning biometrik ma’lumotlar bazasining mavjudligi jinoyatlarni ochishning yangi bosqichiga chiqish imkonini beradi.
Migratsiya siyosatini qattiqlashtirish
Ayni paytda Rossiya ichki migratsiya siyosatini kuchaytirmoqda. Masalan, mart oyida Rossiya Mehnat vazirligi o‘z mutaxassisligidan tashqari ishlayotgan mehnat muhojirlarini deportatsiya qilishni va ularni vaqtinchalik ishlash uchun maxsus hujjat olishga majburlashni taklif qilgan edi.
“Bundan tashqari, agar bunday xodim tashkiliy ishga qabul qilish ishtirokchisi bo‘lmagan boshqa korxonada ishlash istagini bildirsa, u 15 kun ichida Rossiya hududini tark etishi kerak”, deyiladi xabarda.
Aprel oyida Rossiya Ichki ishlar vazirligi migrantlarning yil davomida qolish muddatini 90 kungacha qisqartirishni taklif qilgan edi. Chet elliklar bo‘lish qonuniyligini elektron tasdiqlamasdan turib, ularning huquqlari cheklanishi mumkin.
Iyun oyida prezident matbuot kotibi Sherzod Asadov 2016-yildan beri Rossiyadagi o‘zbekistonlik mehnat muhojirlari soni to‘rt baravar kamayganini ta’kidlagan edi. U bir necha million o‘zbek fuqarolarining o‘z vataniga qaytishini “o‘tkazilayotgan iqtisodiy islohotlar samaradorligi” bilan izohlaydi.
Iyul oyida Rossiya Davlat dumasi mamlakatda bo‘lish uchun qonuniy asosga ega bo‘lmagan xorijiy fuqarolarni chiqarib yuborishning yangi tartibi to‘g‘risidagi qonunni qabul qildi.
Sentabr oyida Moskva aeroportlarida 1-oktabrdan xorijliklar uchun qo‘shimcha tekshirish joriy etilishi haqida ma’lum qilindi.
Qayd etilishicha, Domodedovo, shuningdek, Sheremetevo va Vnukovo aeroportlarida Rossiyaga kelish va jo‘nab ketishda chet elliklarni suratga va barmoq izlarini olish tartibi ishga tushiriladi.
Bundan tashqari, mehnat muhojirlariga oilalarini mamlakatga olib kelishni taqiqlovchi qonun loyihasi tayyorlanmoqda.
“Qarindoshlar va oilalarga kelsak, ular migrant kelgan mamlakatda kutishlari kerak”, dedi Rossiya Davlat Dumasi raisi Vyacheslav Volodin. “Bu yerga hammani tashishning hojati yo‘q”, deya qo‘shimcha qildi u.
