Xitoyning “Xpeng” kompaniyasi dunyodagi birinchi uchar avtomobil zavodi qurishni boshladi. Bu haqda “Carnewschina” nashri xabar berdi.
Qayd etilishicha, “Xpeng” kompaniyasi 27-oktabr kuni poydevor qo‘yish marosimini o‘tkazgan. 2026-yilga kelib u 10 ming donagacha uskunalar ishlab chiqarishni rejalashtirmoqda.
Qurilishning birinchi bosqichi 180 ming kvadrat metr maydonni egallaydi. Xususan, u “Xpeng Land Aircraft Carrier” uchar avtomobili uchun havo modulini ishlab chiqaradi.
Modul 2024-yil sentabrida sinovdan o‘tkazildi, “Xpeng” yil oxirigacha avtomobillar sotilishini va hozirda 3 mingga yaqin arizalar qabul qilinganini ma’lum qildi.
Ma’lumotlarga ko‘ra, “Land Aircraft Carrier” taxminan 2 mln yuan (taxminan $280 ming) turadi. Mashina minimalist uslubda ishlab chiqarilgan va butunlay elektrdir.
Aralash rejimda (havo/yer) bir marta quvvatlanganda 1000 km masofani bosib o‘ta oladi, 30%dan 80%gacha quvvatlanish esa atigi 18 daqiqa davom etadi. Qurilma haydovchining aralashuvisiz avtomatik ravishda qo‘nishga qodir.
“Xpeng” kompaniyasining uchar avtomobillarni ishlab chiqish bo‘limi “Xpeng AeroHT” dastlab zavod qurilishini sentabr oyida boshlashni rejalashtirgan, biroq uning poydevori oktabr oyining oxirigacha qo‘yilmagan, deb yozadi nashr.
Oktyabr oyi o‘rtalarida Xitoyning “Chery” avtomobil ishlab chiqaruvchisi quruqlikdagi va havo transporti deb nomlangan o‘zining birinchi uchar mashinasini namoyish etdi.
U tepasida kichik vertolyot o‘rnatilgan sport avtomobiliga o‘xshaydi. Avtomobil vertikal uchish va qo‘nishni qo‘llab-quvvatlaydi.
Qayd etilishicha, undan qisqa parvozlar uchun, masalan, biron bir to‘siqni aylanib o‘tish uchun foydalanish maqsadga muvofiq hisoblanadi.
Yangi mahsulot havoda 40 daqiqagacha qolishi mumkin. Parvozning maksimal balandligi 1 km, vertolyot esa soatiga 120 kmgacha tezlasha oladi.
Ichkariga ikki kishi sig‘ishi mumkin, rul yoki pedallar yo‘q, mashina avtopilot tomonidan boshqariladi.
Avtomobil ishlab chiqaruvchisi allaqachon uni sinovdan o‘tkazgan, biroq ommaviy ishlab chiqarishga yo‘lga qo‘yishi yoki qachon ishga tushirilishi haqida hozircha ma’lumot bermagan.
Avvalroq 2025-yilgacha Nyu-York va Los-Anjelesda havo taksisi ishga tushirilishi haqida xabar berilgandi.
“Joby Aviation” kompaniyasi qurilmalari avtomobillar va vertolyotlarga muqobil sifatida qaralmoqda. Startap “Toyota” va “Delta Airlines” kompaniyalaridan investitsiyalarni jalb qilib, “Uber” bilan hamkorlikka kirishdi.
Qayd etilishicha, sayohat narxi “Uber Black” tarifi darajasida bo‘ladi — taxminan $100−200. Kelajakda u “Uber XL” narxlariga tushishi mumkin — $50−100.
“eVTOL Joby"ning asosiy afzalliklaridan biri uning past shovqin darajasidir. “Joby” bosh direktori Joben Bevirtning so‘zlariga ko‘ra, 500 metr balandlikda qurilmadan chiqadigan ovoz “daraxtlardagi shamol ovoziga” o‘xshaydi. “NASA” parvoz shovqin darajasini atigi 45,2 detsibel deb qayd etdi, bu muzlatgichdan ham jimroq.
“Joby” shuningdek, White Plains va Long Island kabi uzoqroq aeroportlarga yo‘nalishlarni kengaytirishni rejalashtirmoqda.
Delta allaqachon Nyu-York va Los-Anjelesda VTOL (vertiport) saytlarini ishlab chiqish ustida ishlamoqda.
Shuningdek, Xitoy, BAA va boshqa mamlakatlarda havo taksilarini joriy etish kutilmoqda. “Joby” modellari Dubayda 2026-yil boshida ishga tushirilishi rejalashtirilgan.
“The Telegraph” nashrining yozishicha, dastlabki bosqichda uchar taksilar premium xizmatlar bilan taqqoslanadigan darajada qimmat bo‘lishi mumkin.
Avvalroq “Spot” “Boeing” uchuvchisiz uchar taksilarni ishlab chiqarishni rejalashtirayotgani haqida yozgandi.
Kompaniya 2030-yilgacha bunday avtomobillar bilan o‘zi boshqariladigan taksilar xizmatini yo‘lga qo‘yishi kutilmoqda.
