O‘zbekistonga pul o‘tkazmalari hajmi o‘sishda davom etmoqda. Bu haqda 31-oktabr kuni o‘tkazilayotgan matbuot anjumanida Markaziy bank raisi Mamarizo Nurmuratov ma’lum qildi.
Joriy yilning to‘qqiz oyi davomida xorijdan jo‘natilgan pul mablag‘lari hajmi $11,262 mlrdni tashkil etib, ko‘rsatkich o‘tgan yilning mos davriga nisbatan 35%ga oshgan.
Markaziy bank raisining qayd etishicha, o‘n oyda amalga oshirilgan pul o‘tkazmalari hajmi 12,5 mlrdga yetgan.
O‘tkazmalarning 77%i Rossiya hissasiga to‘g‘ri keladi. Yanvar-sentabr oylarida mamlakatdan jami $8,755 mlrd miqdorida pul mablag‘lari jo‘natilgan bo‘lib, o‘sish 35%ni tashkil etdi.
Undan keyingi o‘rinda $625 mln bilan Qozog‘iston hamda $420 mln bilan (o‘tgan yilning mos davriga nisbatan o‘sish — 76%) Janubiy Koreya turibdi.
Shu bilan birga, AQShdan $415 mln, Turkiyadan $291 mln hamda Buyuk Britaniyadan $93 mln miqdorida (67%) pul mablag‘lari jo‘natilgan.
Polsha transchegaraviy jo‘natmalar hajmi o‘sishi bo‘yicha (97%) yuqori o‘rinda joylashdi. O‘tgan davrda mamlakatdan jo‘natilgan mablag‘lar $48 mlnni tashkil etgan. Shuningdek, BAAdan pul jo‘natmalari hajmi 66%ga o‘sdi.
Joriy yilning birinchi yarmida xorijdan O‘zbekistonga pul o‘tkazmalari hajmi 25%ga oshgandi.
Avvalroq Markaziy bank energiya resurslari narxining o‘zgarishi va ayrim tovarlar taklifida inflyatsion xatarlar yuzaga kelishi mumkinligini qayd etgandi.
