“Hududgazta'minot” test rejimida o‘zining “Hudud Gaz Ta’minot” mobil ilovasini ishga tushirdi. Bu haqda kompaniya matbuot xizmati xabar berdi.
Iste’molchilar ilova orqali tabiiy gaz sarfi va xarajatlarini onlayn kuzatib borishlari mumkin.
Ilovada kunlik va oylik tabiiy gaz iste’moliga oid ma’lumotlarni olish hamda gaz hisob raqamlariga to‘lov qilish imkoni mavjud.
Shu bilan birga, suyultirilgan gaz iste’molchilari o‘z hisoblarini to‘ldirish va biriktirilgan ballonlar ro‘yxatini ko‘rib borishlari mumkin. Suyultirilgan gaz balonini uchun buyurtma berish imkoniyati ham yaratiladi.
Mobil ilovani Android hamda iOS operatsion tizimi qurilmalari uchun bepul yuklab olish mumkin. Mobil ilova dasturi avtomatlashtirilgan holda yangilab boriladi.
Unga kirgach, iste’molchi o‘ziga tegishli bo‘lgan shaxsiy hisob raqam hamda “One ID” xizmati orqali ulanishi mumkin.
Avgust oyida “Hududiy elektr tarmoqlari” “HET Billing” mobil ilovasini ishga tushirgandi. Unda to‘lovlar, kunlik va oylik elektr energiyasi iste’moliga oid ma’lumotlarni kuzatib borish mumkin. Ilovadan foydalanish uchun shaxsiy hisob raqamni kiritish kerak.
