“Apple” o‘zining raqamli yordamchisi “Siri” uchun o‘zgarishlar tayyorlamoqda, deya xabar berdi “Bloomberg”.
2026-yilda tizim katta til modellari (LLM) asosida yangi asosga ega bo‘lishi mumkin, bu esa kompaniya qurilmalari bilan muloqotni yanada tabiiy va samarali qilishga yordam beradi.
“Bloomberg"ning qayd etishicha, “LLM Siri” kod nomi bilan tanilgan ushbu loyiha ovozli yordamchi funksiyasini mutlaqo yangi bosqichga ko‘tarishni va’da qilmoqda.
“Siri"da nimalar o‘zgaradi?
Xizmatning hozirgi versiyasi o‘zining cheklovlari bilan tanilgan: qat’iy so‘rovlar, standart javoblar, ilovalar bilan cheklangan o‘zaro aloqa.
Yangi tizim bilan bu muammolar ortda qoladi. “Apple Siri’ni quyidagi vazifalarni bajara oladigan universal yordamchiga aylantirmoqchi:
- buyruq aniq ifodalanmagan bo‘lsa ham, suhbat mazmunini tushunish;
- ilovalarda murakkab ishlarni bajarish: masalan, eslatmalar yaratish, uchrashuvlarni rejalashtirish yoki sizning afzalliklaringizni hisobga olgan holda xabar matnlarini yozish;
- “Apple Intelligence” sun’iy intellektining o‘rnatilgan vositalaridan foydalanib hujjatlarni yaratish va ularning qisqacha mazmunini tuzish.
Yangi yordamchida qo‘llaniladigan LLM texnologiyasi “Siri"ga foydalanuvchi so‘rovlarini yanada chuqurroq darajada tahlil qilish imkoniyatini beradi.
Masalan, foydalanuvchi “Keyingi haftaga nimalar rejalashtirilgan?” deb so‘rasa, nafaqat tadbirlar ro‘yxatini, balki agar vaqt yetishmasa, uchrashuvlarni ko‘chirish bo‘yicha takliflarni ham olishi mumkin.
Yangilanishlar qachontaqdim qilinadi?
“Siri"ning to‘liq o‘zgarishi bosqichma-bosqich amalga oshiriladi. Hozirda “Apple iOS 18.2” doirasida ayrim funksiyalarni sinab ko‘rmoqda.
Ushbu yangilanishlar “ChatGPT” bilan integratsiyani, ovozli buyruqlarni yaxshiroq qayta ishlashni va ilovalar ichidagi harakatlarni boshqarish imkoniyatini qo‘shdi.
2025-yilda “WWDC” konferensiyasida kompaniya iOS 19 va macOS 16 operatsion tizimlarini taqdim etadi va u yerda “LLM Siri” haqida e’lon qiladi. Biroq, yangi tizimni to‘liq joriy etish 2026-yil bahorida rejalashtirilgan.
Bu bozorni qanday o‘zgartiradi?
“Apple” “Siri"ga sun’iy intellektni joriy etishda biroz kechikayotgan bo‘lsa-da, kompaniya funksiyalarning sifati va noyobligiga e’tibor qaratmoqda.
Raqobatchilar universal yechimlarni taklif qilayotgan bir paytda, kompaniya ishlanmasi Kupertino qurilmalari ekotizimiga chuqur singdirilgan holda qolmoqda.
Bu, ayniqsa, maxfiylik va qulaylikni qadrlaydigan foydalanuvchilar uchun muhim afzallikka aylanishi mumkin.
Mutaxassislarning fikricha, yangi “Siri” nafaqat virtual yordamchilar bozorini, balki gadjetlar bilan muloqot qilish usulini ham o‘zgartira oladi.
U shunchaki ovozli yordamchi emas, balki buyruqlarni bajarishdan tashqari, ehtiyojlarni oldindan seza oladigan to‘laqonli hamkorga aylanishni va’da qilmoqda.
