“Zeekr”
Xitoyning premium aqlli elektr avtomobillar ishlab chiqaruvchisi “Zeekr” kompaniyasi O‘zbekiston bozoriga kiradi. O‘zbekiston Markaziy Osiyoda Qozog‘istondan keyin ikkinchi bozorga aylandi, u yerda “Zeekr” o‘zining elektromobillari savdosini rasman boshlagan.
Mahalliy bozorda xitoylik avtomobil ishlab chiqaruvchisi mashhur modellarni taqdim etadi: “Zeekr 001”, “X” va yangi “007”.
Elektromobillar rus tilidagi sozlamalar va to‘g‘ridan-to‘g‘ri ishlab chiqaruvchining kafolatiga ega bo‘ladi.
“Porsche”
Noyabr oyida Toshkentda O‘zbekiston va Markaziy Osiyoda birinchi “Porsche” shou-rumining ochilishi bo‘lib o‘tdi. Nemis avtomobil ishlab chiqaruvchisining shouurumi shahar markazida joylashgan bo‘lib, mijozlar uchun namoyish zali va dam olish zonasi funksiyalarini birlashtiradi.
2025-yilga qadar “Yangi O‘zbekiston” hududida servis xizmati va kengaytirilgan modellar assortimentiga ega to‘laqonli dilerlik markazini qurish rejalashtirilgan.
“Inditex”
"Tashkent City Mall" savdo markazi poytaxtning Botir Zokirov ko‘chasi, 7-uyda joylashgan. Unda taqdim etilgan brendlar qatorida Ispaniyaning “Inditex” kompaniyasi bor: “Zara”, “Zara Home”, “Massimo Dutti”, “Oysho”, “Bershka”, “Stradivarius” va “Pull&Bear”.
"CMWP" konsalting kompaniyasi tahlilchilarining ta’kidlashicha, O‘zbekistonning boshqa hududlarida, shuningdek, qo‘shni mamlakatlar — Tojikiston va Qirg‘izistonda bunday brendlarning mavjud emasligi Toshkentni sayyohlar uchun xarid qilish va hordiq chiqarishni o‘zida mujassam etgan jozibador manzilga aylantirishi mumkin.
“Agalarov Development“
Ozarbayjonlik “Agalarov Development” kompaniyasi prezidenti Emin Agalarov shu yilning avgust oyida Toshkentda yangi turar-joy majmuasini qurish rejalarini e’lon qilgandi.
1,98 gektarlik turar-joy majmuasi besh yulduzli “Miran International” mehmonxonasi va “O‘zmilliybank” filiali yonida quriladi. Loyihaga ko‘ra, “Evos” va “Stoloffka” umumiy ovqatlanish shoxobchalari, shuningdek, bir nechta binolar buziladi.
Qurilish jarayonlari sentabr oyida boshlanadi. 750 xonadonli premium apart-mehmonxona formatida ishlab chiqilgan loyiha 21 qavatli to‘rtta baland minora va 27 qavatli bosh minorani qurishni nazarda tutadi. Investitsiya loyihasining qiymati $133 mlnni tashkil etadi, hududda “chuqur o‘ylangan infratuzilma, qulay avtoturargoh va obodonlashtirilgan hovli” mavjud bo‘ladi.
“Agalarov Development” — biznesmen Emin Agalarovning ko‘p tarmoqli kompaniyasi bo‘lib, 10ta biznes yo‘nalishi va 60dan ortiq loyihalarni ishlab chiqadi. Kompaniyaning flagman loyihasi “Sea Breeze” kurort-shahri bo‘lib, allaqachon 2 mln kvadrat metrdan ortiq uy-joy mavjud.
Foto: Agalarov Development
“Wolt”
Finlyandiyaning “Wolt” oziq-ovqat va tovarlarni yetkazib berish xizmati sentyabr oyida O‘zbekistonda o‘z faoliyatini boshladi. 2014-yilda tashkil etilgan kompaniya 28ta mamlakatda, jumladan, Gruziya, Ozarbayjon va Qozog‘istonda mavjud.
Korxonalar va tashkilotlarning yagona davlat reyestriga ko‘ra, kompaniyaning ustav kapitali 6,15 mlrd so‘mni tashkil etadi va rahbari Elina Mariya Hakkarainen hisoblanadi.
“Yandex Lavka”
Noyabr oyida “Yandex Uzbekistan” “Lavka” tezkor oziq-ovqat yetkazib berish xizmatini ishga tushirdi.
Hozirda buyurtmalar Nukus, Arnasoy ko‘chalari va Chilonzor massivida joylashgan uchta darkstor orqali yetkazib beriladi. Xizmatning ish boshlashi bilan 160dan ortiq ish o‘rinlari paydo bo‘ladi, yangi omborlar ochilishi bilan esa yana 500dan ortiq ish o‘rinlari yaratilishi rejalashtirilgan.
“Galmart”
Avgust oyida Toshkentda Qozog‘istonning “galmart” riteyleri birinchi supermarketining texnik ochilishi bo‘lib o‘tdi. “CMWP” konsalting kompaniyasi ma’lumotlariga ko‘ra, supermarket “Tashkent City Mall"dagi 6 ming kvadrat metrga yaqin maydonni egallaydi.
Supermarket dushanbadan payshanbagacha — 10:00dan 23:00gacha, jumadan yakshanbagacha esa 10:00dan 00:00gacha ishlaydi.
Foto: CMWP Uzbekistan
“Papa Johns”
Amerikaning “Papa John’s” pitsa tarmog‘i O‘zbekiston bozoriga kirib keldi. Kompaniya shu yilning yanvar oyida o‘z faoliyatini boshlagan.
Ovqatlanish nuqtalari “Compass” savdo markazi, “Tashkent City Mall”, “Riviera”, “Dream Park” ko‘ngilochar bog‘i, “Sayram” ko‘chasi va “Minor” metrosi hududida ochiladi.
“Pizza Hut”
“Pizza Hut” restorani iyulda fud-kort hududida joylashgan “Tashkent City Mall” savdo-ko‘ngilochar markazida ochildi. Ikkinchi nuqta “Seoul Mun” turar-joy majmuasida joylashadi.
“Pizza Hut” — 1958 yilda Kanzas shtatining Vichita shahrida Den va Frenk Karni tomonidan asos solingan Amerika ko‘p millatli pizza tarmog‘i va xalqaro franchayzing.
“Dominos Pizza”
May oyida “Domino's Pizza” Toshkentdagi birinchi restoranini ochdi. Birinchi filial Labzak massividagi 9A-binosida joylashgan.
“Domino's Pizza Uzbekistan” direktori yangi filiallar uchun joy tanlashda yirik savdo va ko‘ngilochar markazlarga ustuvor ahamiyat bermasligini ta’kidladi.
Restoratorning aniqlik kiritishicha, “Domino's Pizza"ga mahsulot yetkazib berishning 90%dan ortig‘i mahalliy ishlab chiqaruvchilar tomonidan ta’minlanadi.
“ELLE”
Iyun oyida “ELLE” media brendi o‘zbek tilidagi raqamli platforma va ijtimoiy tarmoqlardagi sahifalarni ishga tushirdi, sentyabr oyidan esa jurnalning bosma nashrini chiqara boshladi.
Brendga egalik qiluvchi “Lagardère Group” kompaniyasi “Gemina Publishing” bilan yangi bozorga chiqish bo‘yicha shartnoma tuzdi. “ELLE” O‘zbekiston o‘zbek tilida kontent chiqaradigan birinchi xalqaro nashr hisoblanadi.
Foto: ELLE O‘zbekiston
“Bork”
Iyun oyida “Tashkent City Mall"da Rossiyaning “Bork” premium maishiy texnika brendining birinchi do‘koni ochildi. Firma maydoni 1ming kvadrat metrni tashkil etadi.
Ko‘chmas mulk bo‘yicha maslahatchi Anna Savchenkoning so‘zlariga ko‘ra, yangi bozorlarga kirishda brend o‘z mahsulotlarining tan olinishini oshirishi kerak bo‘ladi.
“Bork” brendi 2001-yilda “Texnopark” tarmog‘ining egasi (hozirgi maishiy texnika onlayn-do‘koni) Maksim Biryulin tomonidan tashkil etilgan.
Xitoyning “Eksimbanki”
22-noyabr kuni Toshkent shahrida Xitoy Eksport-import (Eksim) banki vakolatxonasining ochilish marosimi bo‘lib o‘tdi.
Xitoyning Eksimbanki (The Eksport-Import Bank of China) 1994-yilda tashkil etilgan. Bank $800 mlrddan ortiq aktivlarga ega va tashqi savdo hamda xalqaro iqtisodiy hamkorlikni qo‘llab-quvvatlash bo‘yicha Xitoyning yetakchi moliya instituti hisoblanadi.
Mintaqaviy ofis bankning 8ta davlat, jumladan, O‘zbekiston, Qozog‘iston, Qirg‘iziston, Tojikiston, Turkmaniston, Ozarbayjon, Armaniston va Gruziyadagi faoliyatini yuritadi.
“Women in Tech“
Mart oyida Toshkentda IT sohasida teng huquqlilikni targ‘ib qilish, ta’limni rivojlantirish va xotin-qizlarni ilmiy-texnik mutaxassisliklarga jalb qilish bilan shug‘ullanuvchi “Women in Tech” notijorat tashkilotining filiali ish boshladi.
Tashkilotning bosh qarorgohi Parijda joylashgan bo‘lib, O‘zbekiston “Women in Tech” faoliyat yuritayotgan 49-mamlakatga aylandi. Toshkentdagi ofis tashkilotning Markaziy Osiyodagi birinchi vakolatxonasi sanaladi.
“Sojitz”
Iyul oyida Toshkentda Yaponiyaning eng yirik savdo-investitsiya korporatsiyalaridan biri, dunyoning 50dan ortiq mamlakatlarida ofisiga ega bo‘lgan “Sojitz Corporation” kompaniyasining vakolatxonasi ochildi.
“Sojitz” faoliyati energetika, infratuzilma, transport, ko‘chmas mulk va kimyo sanoati kabi sohalarni qamrab oladi. Kompaniyaning O‘zbekistondagi asosiy loyihalaridan biri Samarqandda $300 mlnlik tibbiyot markazi qurilishi bo‘lib, uni 2025-yilda boshlash rejalashtirilgan.
“Neta”
Xitoyning “NETA Auto” elektromobil ishlab chiqaruvchisi oktyabr oyida o‘zining mashhur “NETA X” modelini O‘zbekiston bozoriga taqdim etdi, bu kompaniyaning Markaziy Osiyodagi birinchi modeli bo‘ldi.
Kompaniya ta’kidlashicha, O‘zbekistonning mintaqadagi birinchi bozor sifatida tanlanishi mamlakatning mintaqaviy transport va iqtisodiy markaz sifatidagi o‘rni tufayli strategik ahamiyatga ega.
Foto:Neta Auto
“Azimut Hotels”
Rossiyaning Azimut Hotels mehmonxonalar tarmog‘i iyul oyida poytaxt markazidagi Shota Rustaveli ko‘chasida yangi 4 yulduzli mehmonxona ochdi.
“AZIMUT Hotels” — Rossiyaning eng yirik mehmonxonalar tarmog‘idan biri. Tarmoqning O‘zbekiston bozoriga chiqish qarori ushbu mintaqadagi sayyohlar o‘rtasida mehmonxona xizmatlariga bo‘lgan talabning yuqoriligi bilan izohlangan.
“Ritz-Carlton”
Fevral oyida Toshkentda “Ritz-Carlton” brendi mehmonxonasini qurilishi rejalashtirilayotgani ma’lum bo‘ldi.
“Ritz-Carlton” — 5 yulduzli mehmonxona va kurortlarni boshqarishga ixtisoslashgan lyuks toifasidagi xalqaro brend.
150 xonadan iborat 5 yulduzli mehmonxonani 2026-yilda foydalanishga topshirish rejalashtirilgan. Loyihaning umumiy qiymati $200 mlnni tashkil etadi.
“Sellty”
Rossiyaning “B2B” internet-do‘konlarini yaratish platformasi “Sellty” yanvar oyida O‘zbekiston bozoriga kirishini e’lon qildi.
Rossiya IT-startapi O‘zbekiston bozorini tanlashni mahalliy biznesning zamonaviy texnologik yechimlarni joriy etishga tayyorligi va ulgurji savdoni avtomatlashtirish imkoniyatiga qiziqishi bilan izohladi.
“Sellty” respublikada vitrinalarga tovar pozitsiyalarini avtomatik yuklash, tovar guruhlari va toifalarini boshqarish, hamkorlar bilan individual narx kelishuvlarini olib borish, ko‘p omborli tizim funksiyasi, “1S” dasturi bilan integratsiyalashish va boshqa vositalarni taklif etmoqda.
“Adamas”
Rossiyaning “Adamas” zargarlik tarmog‘i iyul oyida Samarqandda o‘z do‘konini ochdi.
Qayd etilishicha, “Adamas” Qozog‘iston, Belarus, O‘zbekiston, Qirg‘iziston va Ozarbayjon bozorlariga kirmoqchi. Yil oxirigacha mazkur mamlakatlarda kamida 20ta do‘kon ochish rejalashtirilgandi.
“Arnest Packaging Solutions”
Oktyabr oyida Rossiyaning “Arnest Packaging Solutions” kompaniyasi O‘zbekistonda alyuminiy idishlar ishlab chiqarishni yo‘lga qo‘yish bo‘yicha shartnoma imzoladi.
Zavod “Navoiy sanoatni rivojlantirish kompleksi” maxsus sanoat parki hududida quriladi. Rossiya tomoni $100 mln sarmoya kiritishni va uni 2025-yilning kuzida ishga tushirishni rejalashtirmoqda.
Korxonaning quvvati yiliga 1,5 mlrd bankadan oshadi va unda 200dan ortiq yangi yuqori malakali ish o‘rinlari yaratiladi.
Mamlakat bozoriga yana kimlar kirishi mumkin
“Tatler”
"Tatler"ning bosma va elektron versiyalari O‘zbekiston va mintaqaning boshqa mamlakatlarida 2025-yilda ishga tushirilishi rejalashtirilgan. Nashr Qozog‘iston, Turkiya, Ozarbayjon va O‘zbekistonda chop etiladi.
Foto:Tatler
“Yevrosiyo banki”
“Yevroosiyo banki” 1994-yili tashkil etilgan bo‘lib, bosh ofisi Olmaotada joylashgan. Bank ustav kapitali 61,1 mlrd tengeni tashkil etadi.
2022-yilning dekabrida Qozog‘iston banki O‘zbekistonda sho‘ba korxonasini ochishni rejalashtirayotgani ma’lum qilingandi. 2023-yilning mayida Yevroosiyo banki O‘zbekistonda sho‘ba korxonasini ochish uchun dastlabki ruxsatni olgani xabar berildi.
Bank respublikada yil oxirigacha ish boshlashi kerak edi.
“Ledi Prima”
Chelyabinskdagi “Ledi Prima” kompaniyasi va mamlakatimizning “Asia Invest Textile” korxonasi Samarqandda to‘qimachilik fabrikasini ochish to‘g‘risida kelishuv imzoladi.
Investitsiya loyihasining qiymati taxminan ₽130 mln ($1,5 mln) bo‘lib, korxonaning ishga tushirilishi 2024−2025-yillarga rejalashtirilgan.
O‘zbekistonga kengayishning sabablaridan biri Chelyabinsk viloyatida malakali kadrlar taqchilligi bo‘lib, ularni “topish tobora qiyinlashib bormoqda”. “Ledi Prima” ta’minot xizmati rahbari Samarqandda barcha zarur resurslar va kadrlar mavjudligini ta’kidladi.
“Vodafone”
2025-yilda O‘zbekistonda Britaniyaning Vodafone mobil operatori ishga tushiriladi.
“Yashin tezligida ishlarni amalga oshirish uchun bizga yashin tezligida internet kerak. Biz dunyoning nufuzli kompaniyalaridan biri — Buyuk Britaniyaning „Vodafone“ kompaniyasi bilan O‘zbekistonda „5G Stand Alone“ (SA) mobil aloqasini ishga tushirish bo‘yicha ishlarni boshladik”, — dedi Farhod Mamatjonov.
Investitsiyalar hajmi €250 mlnni tashkil etadi.
“Sushi Wok”
Rossiyaning “Sushi Wok” (Суши Wok) yapon va pan-osiyo oshxonasi do‘konlari tarmog‘i O‘zbekiston bozoriga kirishni rejalashtirmoqda.
“Yana bir istiqbolli bozor — bu O‘zbekiston, u ham juda katta va faol rivojlanmoqda. Hozirda u yerda bir nechta shunga o‘xshash oshxonalar mavjud va bular asosan qimmat restoranlar bo‘lib, ular ommaviy iste’mol uchun emas. Bizning vazifamiz mahsulotimizni eng keng iste’molchiga taqdim etishdir, bu „Sushi Wok“ konsepsiyasiga asoslanadi” — dedi “Kommersant” nashri tarmoq boshqaruvchi hamkori Konstantin Sagalov.
Foto: Proriat Franchise
“Geely”
Xitoyning “Geely” avtomobil brendi O‘zbekiston bozoriga kirishga faol tayyorgarlik ko‘rmoqda.
Rasmiy taqdimot 2025-yilda amalga oshirilishi rejalashtirilmoqda. “Geely Auto"ning “Spot"ga aniqlik kiritishicha, bu kelasi yilning ikkinchi choragiga belgilanishi mumkin.
Bugungi kunda “Geely”, “Lynk & Co”, “Proton” va boshqa Yevropa hashamdor brendlarining 100dan ortiq modeli “Geely” quvvat tizimi bilan jihozlangan bo‘lib, 60dan ortiq mamlakat va mintaqada muvaffaqiyatli sotilmoqda.
“Kwaaka”
Avvalroq Qozog‘iston startapi “Kwaaka” O‘zbekiston va Gruziyada o‘z faoliyatini boshlash uchun “MOST Ventures” kompaniyasidan mablag‘ jalb qilgani haqida xabar berilgandi.
“Kwaaka” umumiy ovqatlanish korxonalariga yetkazib berish xizmatlarini restoranning kassa tizimlari bilan birlashtirgan holda bitta buyurtma boshqaruv panelini taqdim etadi. Shuningdek, startap oziq-ovqat xizmatiga sayt va dastur bilan o‘z yetkazib berish xizmatlarini tezda ishga tushirishga imkon beradigan vositani ishlab chiqdi.
Hozir Toshkentda ofis ochishga tayyorgarlik ko‘rish bilan bir qatorda “Kwaaka” bo‘lajak mijozlar bilan shartnomalar tuzish ustida ishlamoqda. Kompaniya vakillarining so‘zlariga ko‘ra, ABMNB Group, Bellissimo, KFC, Safia va boshqa yirik o‘yinchilar bilan texnik muzokaralar davom etmoqda.
“XSolla”
"XSolla" — Amerika kompaniyasi bo‘lib, u o‘yin kompaniyalariga o‘z loyihalarini ishlab chiqish, ilgari surish, monetizatsiya qilish va moliyalashtirishda ko‘maklashadi. Kompaniya 2005-yilda tashkil etilgan, hozirda 490 nafardan ortiq ishchi-xodimga ega va yillik daromadi $100 mlndan ziyodni tashkil etadi.
Kompaniya vakillari O‘zbekistonda Gamedev akademiyasini (Game Development Academy) tashkil etish rejasini namoyish etishdi. Kompaniya ko‘nikmalarni rivojlantirish, ish o‘rinlarini yaratish va o‘yin sanoatini qo‘llab-quvvatlashga e’tibor qaratdi.
“IT Park” kompaniyaga loyihani amalga oshirishda barcha zarur yordamni, jumladan, texnopark rezidentlari bilan shartnomalar tuzishda, optimal joylashuvni topishda va kompaniyani O‘zbekistonda qonuniy rasmiylashtirishda yordam ko‘rsatishni maqsad qilgan.
“AvtoVAZ”
Rossiyaning “AvtoVAZ” avtomobil ishlab chiqaruvchisi bu yil O‘zbekiston bozoriga qaytish strategiyasini ishlab chiqmoqda.
“Hozir biz O‘zbekiston bozoriga chiqish — O‘zbekistonga qaytish strategiyasi ustida ishlayapmiz. Bugungi kunda „Lada“ brendini ifodalovchi hamkorlar bilan muzokaralar olib borilmoqda — bular distribyutorlar va importerlar. Biz hamkorlikni davom ettiradigan hamkorlarni aniqlayapmiz. Hozir, muzokaralar davomida, afsuski, biz tafsilotlarni oshkor qilishga hali tayyor emasmiz”, — dedi kompaniyaning eksport bo‘yicha direktori Ilya Savinov.
Avtomobil ishlab chiqaruvchisining yaqin rejalari orasida “Lada Niva Legend”, “Granta”, “Vesta SW Cross” va “Largus” avtomobil modellarini mahalliy bozorga chiqarish kiradi.
“BelAZ”
Mamlakatda BelAZ kon texnikasini ishlab chiqarishni mahalliylashtirish darajasi bosqichma-bosqich oshiriladi va kelajakda 30%ga yetkaziladi. Loyihaning joylashuvi hali aniqlanmagan, mahalliy hamkorlar bilan muhokama qilinmoqda.
Birinchi bosqichda yiliga 20tagacha maxsus texnika ishlab chiqariladi. Kelajakda loyiha quvvati bir necha barobarga — 20−25%ga oshiriladi.
“Haul Trucks” bosh direktori qo‘shma loyiha qiymati mahalliylashtirish darajasiga va hozirda hamkorlar bilan kelishilgan binolar maydoniga bog‘liq bo‘lishini ta’kidladi. Moliyalashtirish teng asosda amalga oshiriladi.
