5-dekabr kuni o‘tkazilgan onlayn auksionda jami 4,1 mlrd so‘mlik avtoraqamlar sotildi. Bu haqda respublika tovar-xom ashyo birjasi matbuot xizmati xabar berdi.
Jismoniy va yuridik shaxslar tomonidan avtoraqam.uzex.uz savdo platformasida xarid qilingan avtomobil raqamlarining umumiy soni 680tani tashkil etdi.
Tuzilgan bitta bitimning o‘rtacha qiymati 6,1 mln so‘m bo‘lgan. Eng arzon avtomobil davlat raqami 1,9 mln so‘mga sotildi.
Shu kuni birja savdolari orqali sotilgan eng qimmat avtoraqam 474 mln so‘mni tashkil etdi.
Bundan ikki kun avval, 3-dekabr kuni o‘tkazilgan auksionda “chiroyli” avtoraqam 357,8 mln so‘mga sotilgandi. Noyabr oyi boshida xaird qilingan eng qimmat avtomobil raqamining qiymati 408 mln so‘m bo‘lgandi.
To‘qqiz oyda birja savdolarida 152 mingdan ortiq avtomobil raqamlari sotilgan bo‘lib, ularning umumiy qiymati 620 mlrd so‘mni tashkil etgan. Avtoraqamlardan 97%i jismoniy, qolgan 3%i esa yuridik shaxslarga to‘g‘ri keladi.
Eng qimmat sotilgan avtoraqam qiymati 517,1 mln so‘mni tashkil etdi. Ikkinchi o‘rinda 10-iyul kuni 508 mln so‘mga sotilgan “chiroyli” avtomobil raqami turadi. Bundan tashqari, sentabr oyida yana bir raqam kimoshdi savdosida 351,9 mln so‘mga sotilgan.
