Raqobat qo‘mitasi Umra tadbirlarini litsenziyasiz tashkil etish xizmatlarini reklama qilganlik uchun sanksiyalar qo‘llanilishini ma’lum qildi.
Qo‘mitaning Xorazm viloyati boshqarmasi tomonidan Urganch shahrida o‘tkazilgan monitoring davomida qoidabuzarlik aniqlangan.
Unda Urganchdagi “Maftun Avia Travel” turoperatori faoliyat yuritgan binoning fasadiga haj (haj va umra) ziyorati tashkil etilgani haqida xabar beruvchi reklama banneri joylashtirilgan.
Shuningdek, “Maftun Avia Travel bilan Umra sayohatini amalga oshiring” so‘zlari yozilgan postlar firmaning ijtimoiy tarmoqlarida joylashtirilgan. Shu bilan birga, u ushbu vazifa uchun litsenziyalangan turoperatorlar ro‘yxatiga kiritilmagan, deyiladi xabarda.
Qo‘mita maxsus komissiyasi kompaniyaga nisbatan “Reklama to‘g‘risida"gi qonunni buzish — xususan, tegishli litsenziyasiz xizmatlar reklamasini joylashtirish bo‘yicha ish qo‘zg‘atdi va kompaniyaga moliyaviy jarima qo‘llanildi.
Dekabr oyi boshida Umra tadbirlarini noqonuniy tashkil etayotgan litsenziyasiz turoperatorlar javobgarlikka tortilgani haqida xabar berilgandi.
Toshkent shahri, Farg‘ona hamda Namangan viloyatlarida turfirmalar tomonidan fuqarolarni noqonuniy ravishda Umraga jo‘natish holatlari aniqlandi.
Avvalroq “Umra” ziyoratini tashkil etish va o‘tkazish faoliyatini amalga oshirish uchun 12ta turoperatorga litsenziya berilgandi.
O‘zbekistonda “Umra” tadbirlarini tashkil etish
Joriy yilning iyun oyida qabul qilingan qaror bilan “Umra” ziyorati bo‘yicha xizmatlar ko‘rsatish litsenziyalanadigan faoliyatning alohida turi sifatida belgilandi. Litsenziya berish vakolati esa Turizm qo‘mitasidan Din ishlari bo‘yicha qo‘mitaga berildi.
Sentabr oyida qo‘mita mazkur tadbirlarni tashkil etayotgan turoperatorlarga ogohlantirish bilan chiqib, yangi talablar 5-oktabrdan kuchga kirishini, turoperatorlar litsenziyalari mazkur sanagacha amalga qilishini qayd etdi.
Undan keyin, 12-oktabr kuni “Umra” tadbirlarini tashkil etish va o‘tkazish jarayonini yaxshilashga qaratilgan hukumat qarori qabul qilindi. Hujjat bilan, endilikda turistik tashkilotlar mazkur xizmatlar uchun yangi talablar asosida litsenziya olishlari kerak bo‘ladi.
Xususan, ular quyidagi talablarni bajarishlari kerak:
- ziyoratchilarga guruh rahbari etib diniy bilim va ko‘nikmalarga ega mutaxassisni tayinlash;
- diniy ta’lim yo‘nalishlari bo‘yicha ta’lim muassasasi yoki O‘zbekiston xalqaro islom akademiyasining bitiruvchisi bo‘lgan kamida 1 nafar mutaxassisning mavjudligi;
- voyaga yetmagan fuqarolarga xizmat ko‘rsatmaslik;
- $1 mlnni “Ziyorat” jamg‘armasiga zaxira sifatida qo‘yish (oldin $100 ming edi);
- o‘z faoliyatini turoperator va turagentlar orqali amalga oshirmaslik;
- ziyoratchilarni toifasi 3yulduzdan kam bo‘lmagan mehmonxonalarga joylashtirish;
- “Umra” xizmatini uchinchi davlatlar orqali ko‘rsatmaslik;
- xizmarlarni litsenziyadagi manzildan boshqa joyda joylashgan vakolatxona va filial orqali ko‘rsatish.
“Spot” litsenziya olishdagi yangi talablar yuzasidan bir qator turoperatorlar bilan suhbatlashib, bu qanday qiyinchiliklarga olib kelgani, narxlarga qanday ta’sir qilishi hamda kelgusida kutilayotgan natijalar haqida fikrlarini o‘rgangandi.
