Joriy yilning o‘n bir oyi yakuniga ko‘ra, O‘zbekiston gaz importini sezilarli darajada oshirdi. Bu haqda “Spot” o‘rgangan Statistika agentligi ma’lumotida keltirilgan.
Yanvar-noyabr oylarida Turkmaniston va Rossiyadan “ko‘k yoqilg‘i” importi 2,8 baravarga oshib, $1,55 mlrdga yetdi. Oylik tabiiy gaz yetkazib berish $186,8 mlnni tashkil etdi. O‘tgan yil yakunlariga ko‘ra, O‘zbekiston mustaqillik tarixida ilk bor gaz eksportchisidan gaz importchisiga aylandi.
O‘tgan oyda Xitoyga gaz eksporti oktabr oyiga nisbatan biroz sekinlashdi — $60,9 mlndan $53 mlngacha. Yil boshidan buyon “ko‘k yoqilg‘i” yetkazib berish $593,4 mln (yilga nisbatan 16,5% o‘sish) ni tashkil etdi.
Biroq Statistika agentligi ma’lumotlari Xitoy Bosh bojxona boshqarmasi ma’lumotlaridan biroz farq qiladi, unga ko‘ra O‘zbekiston joriy yil boshidan buyon $667,3 mlnlik gaz eksport qilgan, bu o‘tgan yilning xuddi shu davriga nisbatan 27,1%ga ko‘pdir.
Bundan tashqari, Xitoy bojxonasi O‘zbekistondan tabiiy gaz yetkazib berishning oylik hajmi oktabr oyidagi $88,93 mlndan noyabr oyida $79,4 mlngacha qisqarganini haqida xabar berdi. Shunga qaramay, bu 2023-yildagi tegishli ko‘rsatkichdan 45,5%ga ko‘pdir.
Xitoyga gaz eksporti bo‘yicha yetakchilikni yil boshidan beri $8,82 mlrdlik “ko‘k yoqilg‘i” yetkazib bergan Turkmaniston egallab turibdi. Ikkinchi o‘rinni Rossiya egalladi, u gaz eksportini chorak qismga — $7,35 mlrdgacha oshirdi. Keyingi o‘rinlarni Qozog‘iston ($1,28 mlrd) va Myanma ($1,27 mlrd) egalladi.
Avvalroq Vladimir Putin Rossiya O‘zbekistonga gaz yetkazib berish hajmini oshirishi haqida xabar bergandi.
2025-yilda “Gazprom” mamlakatga gaz eksportini to‘rt barobarga — 2,8 mlrd kub metrdan 11 mlrd kub metrgacha ko‘paytiradi.
