Avvalroq mahalliy hokimliklarning roli va mas’uliyatini oshirishga qaratilgan prezident farmoni qabul qilingani haqida xabar berilgandi.
Hujjat bilan, hokimliklarga 2025-yilning 1-martidan hududi 10 ming kv.metrdan, baholangan qiymati BHMning 5 ming baravari (1,875 mlrd so‘m) dan oshmagan hamda 6 oy davomida sotilmagan hokimliklarning ko‘chmas mulk obyektlarini ijaraga berish vakolati beriladi. Bunda ularni ijaraga oluvchilar 2 yil ichida yangi loyihani ishga tushirishi va ish o‘rinlarini yaratishi kerak.
Shu bilan birga, to‘g‘ridan to‘g‘ri 10 yilga ijaraga berilgan hamda davlat mulki uchun 4 yil davomida uzluksiz ijara to‘lovlarini amalga oshirgan va shartnoma shartlarini bajargan tadbirkorga xususiylashtirish yoki baholangan qiymatda to‘g‘ridan to‘g‘ri sotish imkoniyati beriladi.
Xalqaro tan olingan xorijiy til va malaka sertifikatlarini olishga o‘qitadigan mahalliy hamda xorijiy mutaxassislar yoki tashkilotlarga dastlabki birinchi yili ijara to‘lovi undirmasdan 5 yil muddatga keyinchalik uning muddatini uzaytirish sharti bilan ijaraga beriladi.
Tuman (shahar)lar hokimliklariga davlat boshqaruvi organlari va tadbirkorlar o‘rtasida “doimiy aloqa” tizimini yaratish maqsadida tuman (shahar)larda Tadbirkorlar jamoatchilik kengashini tuzish vakolati beriladi.
2025-yildan belgilangan vazirlik va idoralarning tuman (shahar) bo‘limlari rahbarlarini mas’ul vazirlik va idoralarning hududiy boshqarmalari bilan kelishilgan holda lavozimga tayinlash va ozod etish, tegishli mas’ullarga rag‘batlantirish yoki intizomiy javobgarlikka tortish choralarini ko‘rishga ruxsat beriladi.
Shu bilan birga, ular 2026-yilgacha belgilangan ro‘yxat bo‘yicha tuman (shahar)larda huquqiy eksperiment tarzida hokimlik faoliyatini “Aholi va tadbirkorlar manfaatlariga xizmat qilish” yondashuvi asosida tashkil etishlari mumkin.
Avvalroq hokimliklarda ichki audit xizmatlari tashkil etilishi ma’lum qilingandi. 2025-yildan moliyaviy va boshqa xavflarning oldini olish maqsadida yirik tashkilotlarda kollegial asosda Xavflarni boshqarish qo‘mitalari tuziladi.
