O‘zbekistonda dehqon bozorlari va savdo majmualarida “narxlarning asossiz oshirilishi” yuzasidan monitoring o‘tkazilmoqda.
Toshkent viloyati hokimligi matbuot xizmatining ma’lum qilishicha, Toshkent viloyati departamenti (taxminan, Bosh prokuratura huzuridagi Iqtisodiy jinoyatlarga qarshi kurashish departamenti) xodimlari mahalliy hokimiyat organlari bilan birgalikda narxlar oshish tendensiyasiga ega bo‘lishi mumkin bo‘lgan tovarlar narxlarining kunlik monitoringini olib bormoqda.
Shuningdek, prognozlar shakllantirilib, uning natijalariga ko‘ra boshqa viloyatlardan mahsulot olib kirish bo‘yicha qarorlar qabul qilinadi, deya aniqlik kiritdi hokimlik.
Toshkent shahar Chilonzor tumani hokimligi mahalliy fermer bozori va “Magnum” savdo majmuasida “narxlarning asossiz oshirilishi” yuzasidan monitoring o‘tkazilgani haqida xabar berdi.
Xususan, savdo rastalaridagi mahsulot sifati va narxi o‘rganilib, mutasaddilar “narxlar asossiz oshirilishiga” yo‘l qo‘ymaslik yuzasidan ogohlantirildi.
Dekabr oyida Raqobat qo‘mitasi yirik savdo tarmoqlariga Yangi yil bayrami davrida oziq-ovqat narxlari barqarorligini ta’minlash bo‘yicha topshiriq bergan edi. Riteylerlar yetkazib beruvchilar tomonidan narxlarning ehtimoliy o‘zgarishi haqida xabar berishlari kerak bo‘ladi.
Bundan oldin qo‘mita o‘zbekistonliklarga chegirmalar va sotuvlar haqida murojaat qilib, soxta aksiyalar tarqalganini ta’kidlagan edi. Tadbirkorlarga iste’molchilarga aniq ma’lumot berish, shuningdek, qoidabuzarlik uchun javobgarlik haqida eslatib o‘tildi.
Avvalroq “Spot” Toshkentdagi supermarketlarda ayrim mahsulotlar narxi pasaygani haqida yozgandi.
Lavlagi, limon, qizil sabzi, grechka hamda shakar kabi 10 xil mahsulotning minimal narxi arzonlashgan. Shu bilan birga, 10 nomdagi mahsulot narxlari oshgan.
