Bir nechta aviakompaniyalar “Azerbaijan Airlines” samolyoti Oqtovda halokatga uchraganidan keyin Rossiyaning ayrim shaharlariga parvozlarni to‘xtatganini e’lon qildi.
“Azerbaijan Airlines” (AZAL) 28-dekabrdan boshlab Bokudan Sochi, Mineralniye Vodi, Volgograd, Ufa, Samara, Nijniy Novgorod, Vladikavkaz va Saratov aeroportlariga parvozlarni vaqtincha to‘xtatadi. Bungacha aviatashuvchi Grozniy va Maxachqal’aga parvozlarni to‘xtatgandi.
Qozog‘istonning “Qazaq Air” aviakompaniyasi 28-dekabrdan 2025-yilning 27-yanvarigacha Ostona-Yekaterinburg yo‘nalishi bo‘yicha “reyslarni bajarishni majburiy ravishda vaqtincha to‘xtatish” haqida xabar berdi.
“Rossiyaga parvozlar xavfini doimiy ravishda baholash natijasida yo‘lovchilar va ekipaj a’zolarining xavfsizligini ta’minlash maqsadida parvozlar to‘xtatildi”, — deyiladi xabarda.
Tashuvchi Omsk va Novosibirskka parvozlarni davom ettiradi. Yekaterinburgga aviaqatnovlarni qayta tiklash xavflarni qayta baholash natijalari asosida amalga oshiriladi. Bekor qilingan reyslar yo‘lovchilariga aviachiptalarning to‘liq qiymati qaytarilishi va “Qazaq Air” aviakompaniyasining muqobil reyslariga bepul qayta bron qilish taklif qilindi.
Bundan tashqari, Isroilning “El Al” aviakompaniyasi Tel-Avivdan Moskvaga barcha reyslarni “Rossiya havo hududidagi voqealarga asoslanib” to‘xtatganini e’lon qildi. Keyingi haftada aviatashuvchi reysni qayta tiklash bo‘yicha vaziyatni qayta baholashni rejalashtirmoqda.
“Uzbekistan Airways” matbuot xizmatining “Spot"ga ma’lum qilishicha, ayni paytda Rossiyaning barcha shaharlariga, jumladan, Maxachqala va Grozniyga barcha reyslar belgilangan jadvalga muvofiq amalga oshirilmoqda.
25-dekabr kuni Bokudan Grozniyga yo‘l olgan “Embraer 190 AZAL” samolyoti Oqtov aeroporti yaqinida halokatga uchradi. Ozarbayjon transport vaziri Rashad Nabiyev samolyotga “tashqi ta’sir” ko‘rsatilganini ta’kidladi. Halokat sabablaridan biri Rossiya raketasi sabab bo‘lgan deb aytilgan.
Avvalroq “Spot” “Air Arabia” Toshkentdan Ras-al-Xaymaga to‘g‘ridan-to‘g‘ri reyslarni yo‘lga qo‘yayotgani haqida yozgandi.
