O‘zbekistonda birinchi “mahalla bankirlari” o‘z faoliyatini boshladi. Bu haqda Toshkent viloyati hokimligi matbuot xizmati ma’lum qildi.
Viloyatda 264ta “mahalla bankirlari” shtati tashkil etilgan bo‘lib, har bir mahallada ular bilan hamkorlikda ishlash uchun “yordamchi agentlar"ni tanlash jarayoni olib borilmoqda.
“Mahalla bankirlari"ning vazifalariga hududning tadbirkorlik imkoniyatlarini o‘rganish, mahalla aholisi bilan muloqot qilish va ularning loyihalarini amalda amalga oshirishda yordam berish kiradi.
“Shuningdek, ular aholiga banklarda kreditlarni rasmiylashtirish, kreditlarni qaytarish, biznes ochish, ishlab chiqarilgan mahsulotlarni sotish jarayonlarida ko‘maklashadi, loyihalarni amalga oshirishda hamkorlik qiladi,” — deb ta’kidlandi poytaxt viloyati ma’muriyati xabarida.
2025-yilga kelib Toshkent viloyatida 350 mingdan ortiq aholini ish bilan ta’minlash rejalashtirilmoqda. Bu maqsadda 22ta tuman va shaharda mahalliy hokimiyatlar va banklar o‘rtasida aholi bandligini ta’minlash hamda daromadini oshirish bo‘yicha hamkorlik shartnomalari imzolangan.
Bundan tashqari, hozirgi kunda barcha tijorat banklari hamda shahar va tumanlar hokimliklari tadbirkorlar bilan qo‘shma uchrashuvlar o‘tkazmoqda. Ushbu uchrashuvlarning birida Markaziy bank raisining o‘rinbosari Ayubxon Kamolov ham ishtirok etdi. Xususan, ishtirokchilar tadbirkorlik faoliyatiga to‘sqinlik qilayotgan muammolarning yechimini izlashmoqda va aholini doimiy ish bilan ta’minlash choralarini ko‘rmoqda.
Foto: Toshkent viloyati hokimligi matbuot xizmati
2024-yil dekabr oyida prezident “mahalla bankirlari"ni joriy etish taklifini ma’qullagan edi. Ular joylarda tadbirkorlik imkoniyatlarini o‘rganib, fuqarolar bilan birgalikda biznes-rejalar tuzishi, kredit berish, biznesni yo‘lga qo‘yish, mahsulot sotishda ko‘maklashishi kerak.
O‘tgan hafta banklarga “Mahalla loyihasi” dasturi bo‘yicha $1 mlrd miqdorida kredit mablag‘lari ajratilgani ma’lum qilindi. 1-fevralga qadar banklarning tuman filiallarida “mahalla bankir"lari o‘z faoliyatini boshlashi lozim.
Avvalroq “Spot” endi ekofaol oilalarga iste’mol kreditini olishda chegirmalar berilishi mumkinligi haqida yozgandi.
Bundan tashqari, “yashil oila” maqomini olgan oilalarga har yili lotereya orqali elektromobil olish imkonini yaratish taklif etilmoqda.
