Qozog‘iston bug‘doy eksportini ko‘paytirdi, deya xabar bermoqda mamlakat qishloq xo‘jaligi vazirligi “Qozog‘iston temir yo‘li” ma’lumotlariga asoslanib.
Sentabr-dekabr oylarida davlat kompaniyasining poyezdlari tomonidan xorij yo‘nalishlariga 3,9 mln tonna yangi hosil doni tashilgan — bu 2023-yilning shu davriga nisbatan 57%ga ko‘pdir. Umumiy don tashish hajmi 1,5 barobarga oshib, 5 mln tonnaga yetdi.
O‘zbekiston Qozog‘iston bug‘doyining asosiy importchisiga aylandi. To‘rt oy ichida 1,5 mln tonna don mahsuloti olib kirilgan bo‘lib, bu 2023-yilga nisbatan 45% ko‘pdir. Ikkinchi o‘rinni 633 ming tonna (+57%) bilan Tojikiston, uchinchi o‘rinni esa 592 ming tonna (+2%) bilan Xitoy egalladi.
Eronga don yetkazib berish 30 barobarga ko‘payib, 455 ming tonnaga yetdi. Shuningdek, Afg‘onistonga yetkazib berish hajmi 51%ga oshib, 190 ming tonnani tashkil etdi. Ozarbayjonga eksport esa qayta tiklanib, 188 ming tonnaga yetgani qayd etildi.
2024-yilda temir yo‘llar orqali jami 10,6 mln tonna g‘alla tashilgan bo‘lib, shundan 8,1 mln tonnasi eksportga yo‘naltirilgan. Yillik yetkazib berishning 40%dan ortig‘i yoki 3,3 mln tonnasi O‘zbekistonga to‘g‘ri keldi, undan keyin 1,7 mln tonna bilan Xitoy turadi.
Bundan tashqari, Qozog‘iston Tojikistonga don yetkazib berishni 20%ga oshirib, 1,2 mln tonnaga yetkazdi. Eronga eksport ikki barobar ko‘payib, 526 ming tonnani tashkil etdi. Shunga o‘xshash o‘sish sur’atlari Ozarbayjon (211 ming tonna) va Qirg‘izistonda (140 ming tonna) ham kuzatildi.
Avvalroq “Spot” Qozog‘iston Rossiya donini O‘zbekiston va Xitoyga reeksport qilishni vaqtincha cheklagani haqida yozgandi.
Cheklov ichki bozorni himoya qilish maqsadida ilgari joriy etilgan uchinchi davlatlar va Yevroosiyo iqtisodiy ittifoqi davlatlaridan bug‘doy importiga taqiq bilan bog‘liq hisoblanadi.
