2024-yil yakunlariga ko‘ra, O‘zbekiston ketma-ket ikkinchi yil gazning sof importchisiga aylandi. Bu haqda “Spot” o‘rgangan Statistika agentligi ma’lumotida keltirilgan.
Yanvar-dekabr oylarida Turkmaniston va Rossiyadan “ko‘k yoqilg‘i” importi 2,41 baravarga oshib, $1,67 mlrdga yetdi. Oylik tabiiy gaz yetkazib berish sekinlashdi va $127,9 mlnni tashkil etdi. 2023-yilda O‘zbekiston mustaqillik tarixida ilk bor gaz eksportchisidan importchisiga aylandi.
O‘tgan oyda Xitoyga gaz eksporti noyabr oyiga nisbatan sezilarli darajada sekinlashdi — $53 mlndan $32,2 mlngacha. 12 oy ichida mamlakatga “ko‘k yoqilg‘i” yetkazib berish $627,6 mlnni tashkil etdi (o‘sish 18,4%).
Biroq Statistika agentligi ma’lumotlari Xitoy Bosh bojxona boshqarmasi ma’lumotlaridan sezilarli darajada farq qiladi. Unga ko‘ra, O‘zbekiston 2024-yilda $726,2 mlnlik gaz eksport qilgan, bu o‘tgan yilning mos davriga nisbatan 25,3%ga ko‘pdir.
Bundan tashqari, Xitoy bojxonasi O‘zbekistondan tabiiy gaz yetkazib berishning oylik hajmi sezilarli darajada — noyabr oyidagi $79,4 mlndan dekabr oyida $58,8 mlngacha qisqarganini qayd etdi. Biroq, bu 2023-yilgi ko‘rsatkich bilan taqqoslanganda 8% dan ortiqdir.
Xitoyga gaz eksporti bo‘yicha yetakchilikni yil boshidan beri $9,57 mlrd “ko‘k yoqilg‘i” yetkazib bergan Turkmaniston egallab kelmoqda. Ikkinchi o‘rinda Rossiya turibdi, mamlakat gaz eksportini chorakga oshirdi — $8,03 mlrdgacha. Keyingi o‘rinlarda Myanma ($1,39 mlrd) va Qozog‘iston ($1,36 mlrd) joylashgan.
Avvalroq “Spot” 2024-yilda O‘zbekistonning tashqi savdo aylanmasi $66 mlrdga yetgani haqida xabar bergandi.
