20 yanvar kuni AQShning 47-prezidenti bo‘lgan Donald Tramp “TikTok” ijtimoiy tarmog‘ini bloklashni kechiktirish to‘g‘risida farmon chiqardi. Bu haqda “CNN Business” nashri xabar bermoqda.
Farmonda Adliya vazirligiga “Do‘stlashmagan chet elliklar tomonidan nazorat qilinadigan ilovalar to‘g‘risida"gi Qonunning ijrosini 75 kunga kechiktirish vazifasi yuklatilgan.
Qayd etilishicha, qaror “millionlab amerikaliklar foydalanadigan platformani keskin o‘chirishning oldini olish” zarurligi bilan izohlanadi.
“Muvaffaqiyatsiz [bloklash talabining kuchga kirishi] taqiqning milliy xavfsizlik va tashqi siyosatga ta’sirini baholash imkoniyatiga to‘sqinlik qilmoqda. Shuningdek, u “TikTok"ning to‘satdan o‘chib qolishining oldini olish uchun qaror qabul qilishga yo‘l qo‘ymaydi,” — deyiladi farmonda.
Oq uy “TikTok” bo‘yicha keyingi harakatlar rejasini belgilashni mo‘ljallamoqda. AQSh Adliya vazirligi internet-provayderlar va telekommunikatsiya operatorlariga farmonning amal qilish muddati davomida platformaga kirishga ruxsat berganligi uchun hech qanday cheklovlar qo‘llanilmasligini ma’lum qilishi kerak.
2024-yil aprel oyida Jo Bayden davrida qabul qilingan qonunga ko‘ra, 19-yanvardan boshlab amerikalik foydalanuvchilar uchun “TikTok"ni bloklash boshlandi. U AQSh yoki unga yaqin yurisdiksiyadagi xaridorga sotilgunga qadar davom etishi kerak edi.
19-yanvar kuni Tramp o‘zining “Truth Social” ijtimoiy tarmog‘ida “TikTok"ning bloklanishiga yo‘l qo‘ymasligini va’da qildi. Uning aytishicha, bu qadam platformani amerikalik sherik 50% ulushga ega bo‘ladigan qo‘shma korxonaga o‘tkazish to‘g‘risidagi kelishuvga erishish imkonini beradi.
“Biz “TikTok"ni qutqaramiz, uni ishonchli qo‘llarda saqlaymiz va faoliyatini davom ettirishiga imkon yaratamiz. AQShning roziligisiz TikTok mavjud bo‘lmaydi. Bizning roziligimiz bilan esa u yuzlab milliard, balki trillion dollarlarga teng qiymatga ega bo‘lishi mumkin,” — deb ta’kidladi tadbirkor.
19-yanvarga o‘tar kechasi “TikTok” AQShda o‘z faoliyatini to‘xtatdi va amerikalik foydalanuvchilar uchun ilovaga kirishni, jumladan VPN orqali ham foydalanishni o‘chirdi. Biroq bir necha soatdan so‘ng platforma yana ishlay boshladi va kirish paytida “Prezident Trampning sa’y-harakatlari tufayli „TikTok“ AQShda yana faoliyat yuritmoqda!” degan xabar ko‘rsatildi.
Avvalroq “Spot” “Neuralink” kompaniyasi uchinchi bemorning miyasiga chip o‘rnatgani haqida yozgandi.
Qayd etilishicha, kompaniya 2025-yil oxirigacha bemorlarga yana 20−30ta chiplarni implantatsiya qilishni rejalashtirmoqda.
