Yanvar oyida O‘zbekistonda iste’mol narxlari indeksi 0,72% ga o‘sdi. Bu haqda Statistika agentligi xabar berdi.
Ko‘rsatkich 2023-yildan buyon yilning birinchi oyi uchun eng yuqori darajaga yetdi. Taqqoslash uchun, 2024-yilning yanvar oyida narxlar bir oyda 0,64% ga oshgan.
Yillik inflyatsiya 9,89% ni tashkil etdi. O‘tgan yilga nisbatan 1,31 foiz punktga ko‘tarilgan bo‘lsa-da, o‘sish sur’ati 12,19% ga yetgan 2023-yilga nisbatan sezilarli darajada pasaygan.
Yanvar oyida oziq-ovqat mahsulotlari narxlari 0,8% ga oshib, 2023-yilning dekabridan beri oylik ko‘rsatkichda maksimal o‘sishni qayd etdi. Yillik oziq-ovqat inflyatsiyasi tezlashdi va 2,6% (+0,2%) ga yetdi.
O‘tgan oy davomida sabzavotlar birdaniga 6% ga, yog‘-moy va baliq mahsulotlari hamda yong‘oqlar 1% dan ziyod qimmatlashdi. Shu bilan birga, sut mahsulotlari (-3,5%), ayniqsa tuxum (-14,3%) narxlari sezilarli darajada pasaydi. Bundan tashqari, go‘sht (+0,8%), ichimliklar (+0,6%) va tayyor mahsulotlar (+0,4%) narxlarida biroz o‘sish kuzatildi.
Baqlajon narxi yarmidan ko‘proqqa, kartoshka esa deyarli chorakka qimmatlashdi. Shuningdek, bulg‘or qalampiri (+13,2%), limon (+7,9%) va karam (+6,9%) narxlari ham oshdi, pomidor va bodring 1% dan ortiqqa, mandarin esa 7,4% ga arzonlashdi.
Yil boshidan buyon eng ko‘p kartoshka (+68,1%), sabzi (+24,1%), paxta yog‘i (+19,5%) va kungaboqar yog‘i (+18,1%), qo‘y go‘shti (+16,2%) va mol go‘shti (+14,8%) qimmatlashgan. Oldingi yanvarga nisbatan baqlajon deyarli 2 barobar, pomidor va anor uchdan bir qismdan ortiq, bulg‘or qalampiri qariyb 30% ga, limon va bodring esa chorak qismdan ortiq arzonlashdi.
Sanoat tovarlari segmentidagi inflyatsiya yanvar oyida 0,3% (-0,1%) gacha pasaydi, ammo yil yakuniga ko‘ra 7,7% gacha tezlashdi. Bir oyda kiyim-kechak, poyabzal va mebel 0,3% va 0,4% ga (bir yilda — mos ravishda 5,3%, 5,1% va 5,4%), maishiy texnika 0,3% ga (bir yilda 5,3%), dori-darmon 0,7% ga (bir yilda 25,2%) qimmatlashdi. Yanvar oyida elektrotexnika mahsulotlari narxlari 0,1% ga va yil davomida 1,7% ga oshdi.
Yanvar oyida benzin 1,5% ga qimmatlashdi, yillik o‘sish esa 3,9% ni tashkil etdi. Metan 0,1% ga (yil davomida +20,9%), propan 13,2% ga (+8,3%) arzonlashdi.
Pullik xizmatlar narxlarining oylik o‘sish sur’ati 2021-yildan buyon eng yuqori ko‘rsatkichga — 1,1% ga yetdi. Yanvar oyida yillik ko‘rsatkich bo‘yicha o‘sish sur’ati 27% gacha tezlashdi, biroq bu o‘tgan yilga nisbatan sezilarli darajada yuqoriligicha qolmoqda. Bu birinchi navbatda energiya tariflarining bahorda oshirilgani bilan bog‘liq.
Umumiy ovqatlanish narxlari bir oyda 0,6% ga, mehmonxonalarda 5,7% ga oshdi, yillik o‘sish mos ravishda 11,7% va 10,7% ni tashkil etdi. Yanvar oyida uy-joy ijarasi 0,6% ga, yillik ko‘rsatkichda esa 13,1% ga qimmatlashdi. Poyezd chiptalari narxi 0,9% ga (yil davomida 13,2%), avtotransport xizmatlari 0,8%ga (11,2%) oshdi, aviachiptalar esa 1,3%ga arzonlashdi.
Avvalroq “Spot” Markaziy bank joriy yilda inflyatsiya 7−8% gacha sekinlashishini prognoz qilgani haqida yozgandi.
