Germaniyaning Bavariya federal yerida Alisher Usmonov uzoq vaqt yashagan villa sotuvga qo‘yildi. Bu haqda “Münchner Merkur” gazetasi xabar berdi.
Nashrning yozishicha, ushbu uy Germaniya zamonaviy tarixidagi eng qimmat ko‘chmas mulkka aylandi.
Ma’lumotlarga ko‘ra, villaning dastlabki narxi 25 mln yevroni tashkil etgan. Bu Germaniyadagi ko‘chmas mulk savdosi haqidagi ma’lumotlarni to‘plovchi “Immowelt agregator” saytining butun tarixi davomidagi eng qimmat ko‘rsatkich bo‘ldi. Mazkur internet-portal 1996-yildan beri faoliyat yuritib kelmoqda.
Villani sotuvga sud qarori asosida mulkni sotishni amalga oshiruvchi hakamlik boshqaruvchisi Ulrix Kramer qo‘ygan.
Kramerning aytishicha, Bavariyaning Volfratsxauzen shahridagi tuman sudi unga Men orolida ro‘yxatdan o‘tgan “Tegernsee (IOM) Limited” offshor kompaniyasi kreditorlarining talablarini qondirish vazifasini topshirgan. Aynan shu kompaniya villani 2011-yilda 7,2 mln yevroga sotib olgan edi.
Alp ko‘li Tegernzee sohilidagi Rottax-Egern qishlog‘ida Fishershtrasse 12 manzilida 4700 kvadrat metr maydonli yer uchastkasida garajli uch qavatli villa joylashgan. 2011-yildan so‘ng Usmonov uni “Tegernsee (IOM) Limited” kompaniyasidan haftasiga 77 ming yevroga ijaraga olgan. “Münchner Merkur” uni “soxta firma” deb atab, kompaniyaning villani ta’mirlashga yana bir necha million yevro sarmoya kiritganini ta’kidlaydi.
Kramerning aytishicha, obyektning 735 kvadrat metr turar-joy maydoni, yuqori ikki qavatda to‘rtta yotoqxona va hammom xonalari, 750 kvadrat metr maydonli sauna, shuningdek 20 metrli suzish havzasi mavjud.
Agar villa sotilsa, “tushgan mablag‘lar men bankrotlik jarayoni uchun ochgan hisob raqamiga o‘tkaziladi, unga faqat men kirish huquqiga egaman,” deb va’da beradi Kramer. Yurist sotuvni ochiq emas, balki “maxfiy marketing kampaniyasi doirasida” tor doiradagi manfaatdor shaxslar o‘rtasida o‘tkazmoqchi.
Huquqshunosning aytishicha, u allaqachon villa oldidagi qayiq angarini sotishga erishgan, u ham “Tegernseer (IOM) Limited” kompaniyasiga tegishli bo‘lgan.
Rottax-Egern aholisidan biri uni taxminan 1 mln yevroga sotib olgan. Kramerning so‘zlariga ko‘ra, yana bir nechta rieltorlar o‘sha firmaning boshqa mulkiga — Usmonovning xodimlari yashagan villa qarshisidagi ikki xonadonli uyning yarmiga qiziqish bildirmoqda. 2018 yilda ushbu ko‘chmas mulk 2 mln yevroga sotib olingan edi.
2024-yilda Gamburg sudi “Tegernseer Stimme” gazetasiga “USM” asoschisi Alisher Usmonov Bavariyada villaga egalik qiladi degan da’voni tarqatishni taqiqlagandi.
Taqiqni buzgan har bir holat uchun sud 250 ming evrogacha jarima soladi, agar bunday jarimani undirish imkoni bo‘lmasa, sudlanuvchi har bir qoidabuzarlik uchun olti oygacha va jami ikki yilgacha ma’muriy hibsga olinishi mumkin.
Usmonovning advokatlari gazetani 2017-yilda chop etilgan maqola yuzasidan sudga bergan edi, unda tadbirkor bir yil davomida Tegernsi ko‘lida “katta villaga ega bo‘lgani haqida mish-mishlar tarqagan”.
Shuningdek, Gamburg sudi “Forbes"ning Alisher Usmonov haqidagi iborasini obro‘sizlantirish deb baholagan edi.
Qayd etilishicha, go‘yoki milliarder Putin uchun “boshqacha rol o‘ynagan” va bu Yevropa Ittifoqi sanksiyalarni qo‘llashiga olib kelgan.
2023-yilning avgustida Gamburg sudi Alisher Usmonov haqidagi “Putinning sevimli oligarxi” degan gaplarni tuhmat, deb topgandi. Sud qo‘llanilgan ta’rifni asosli emas deb topdi, garchi bu ibora rossiyalik tadbirkorga qarshi Yevropa sanksiyalarini asoslash uchun foydalanilganiga qaramay, bu haqda hech qanday ochiq dalil mavjud emasdi.
Alisher Usmonov Rossiya va Ukraina o‘rtasida harbiy harakatlar boshlanganidan bir necha kun o‘tib Yevropa Ittifoqi, AQSh va Buyuk Britaniya sanksiyalariga uchragan.
Biroq, AQSh moliya vazirligi maxsus bosh litsenziyaga ega bo‘lgan rossiyalik milliarderning kompaniyalarini sanksiyalardan chiqarib tashladi.
2022-yilning iyulida Usmonov “USM” kompaniyalarining bankrot bo‘lish xavfini keltirib, YeI sanksiyalariga sud orqali eʼtiroz bildirishga uringani maʼlum bo‘ldi. Sentabr oyida Vengriya rasmiylari tadbirkorni sanksiyalar ro‘yxatidan olib tashlashni talab qilgan, biroq tez orada o‘z talabini qaytarib olgan.
Biroz vaqt o‘tgach, YeI milliarderning singlisi Saodat Nurzievaga nisbatan cheklovlarni olib tashladi. Noyabr oyida OAVda O‘zbekiston hukumati Usmonovga qarshi sanksiyalarni bekor qilishni so‘rab YeIga murojaat qilgani va unga huquqiy yordam taklif qilgani haqida xabarlar tarqalgandi.
Usmonov 2023-yil avgustida Germaniya Federal Konstitutsiyaviy sudiga 2022-yil kuzida Bremen portida “Dilbar” superyaxtasida tintuv o‘tkazilgani munosabati bilan da’vo arizasi bilan murojaat qildi. Biroq, sud tadbirkorning da’vosini qabul qilmadi.
Noyabr oyida Frankfurt-Mayn sudi o‘tgan yilning kuzida musodara qilingan hujjatlar va mol-mulkni “USM” xoldingi asoschisiga qaytarishni buyurdi.