Xitoy Amerikaning “Google” kompaniyasiga qarshi monopoliyaga qarshi tergov boshladi. Bu haqda “RBC” nashri Xitoyning bozorni tartibga solish davlat boshqarmasiga tayanib xabar berdi.
“„Google“ kompaniyasi Xitoyning monopoliyaga qarshi qonunini buzganlikda gumon qilinayotgani sababli tergov boshlandi”, — deyiladi xabarda.
“Bloomberg” ma’lumotiga ko‘ra, AQSh prezidenti Donald Tramp Xitoydan keltirilayotgan tovarlarga 10%lik boj solganidan so‘ng, darhol “Google"ga qarshi tergov boshlanishi e’lon qilindi.
Bu esa “dunyodagi eng yirik iqtisodiyotlar o‘rtasidagi savdo urushini yana alangalatib yubordi”.
Shuningdek, Xitoy AQShdan import qilinadigan neft va qishloq xo‘jaligi texnikasiga 10%lik, ko‘mir va suyultirilgan tabiiy gazga esa 15%lik boj joriy etish kabi javob choralarini ko‘rdi.
2020-yil sentabr oyida “Reuters” nashri Xitoy “Google"ga qarshi monopoliyaga qarshi tergov boshlashga tayyorlanayotgani haqida manbalarga tayanib xabar bergan edi.
O‘shanda kompaniyani Android operatsion tizimining bozordagi ustun mavqeini suiiste’mol qilishda ayblashmoqchi edi. Ish ko‘rib chiqish uchun topshirilgan, biroq tergov boshlanganini e’lon qilinmagan.
Gap qanday bojlar haqida gap ketmoqda?
AQSh prezidenti Donald Tramp Kanada, Meksika va Xitoydan import qilinadigan mahsulotlarga yuqori bojxona tariflari joriy etilganini ma’lum qildi.
1-fevral kuni Tramp Kanada va Meksikadan tovarlarga 25%li tariflar, shuningdek, Xitoy importiga 10%li boj joriy etish to‘g‘risidagi farmonni imzoladi.
Oq uy o‘z qarorining sabablari sifatida quyidagilarni ko‘rsatdi:
- meksikalik giyohvand moddalar kartellari Meksika hukumati bilan nomaqbul ittifoqqa ega;
- Xitoy giyohvand moddalar prekursorlari oqimini to‘xtatish uchun zarur choralarni ko‘rmadi;
- Kanadada sintetik giyohvand moddalar ishlab chiqarish ortmoqda va tadqiqotlar ko‘rsatishicha, Kanada fentanilning mamlakat ichidagi ishlab chiqarilishini kengaytirmoqda.
Kanada va Meksika kelishuvga erishdi
Trampning Meksika prezidenti Klaudiya Sheynbaum va Kanada bosh vaziri Jastin Tryudo bilan muzokaralari davomida ushbu ikki davlat tovarlariga bojlarning kuchga kirishini 30 kunga kechiktirishga qaror qilindi.
Kanada chegarani himoya qilish uchun 10 ming harbiy xizmatchi yuborishga, kartellarni terrorchilik tashkilotlari ro‘yxatiga kiritishga va giyohvand moddalar savdosiga qarshi kurashni kuchaytirish maqsadida fentanil nazoratini tayinlashga rozilik berdi.
Shuningdek, Meksika giyohvand moddalarning noqonuniy aylanishi va noqonuniy muhojirlar oqimiga qarshi kurashish maqsadida chegaradagi nazoratni yana 10 ming xizmatchi bilan kuchaytirmoqda. Bunga javoban AQSH Meksikaga qurol-yarog‘ yetkazib berilishini to‘xtatishda yordam berishga rozilik bildirdi.
Avvalroq “Spot” AQSh Adliya vazirligi “Google"ni raqamli reklama bozoridagi monopoliyada ayblagani haqida yozgandi.
Tahlilchilar kompaniyaning umumiy moliyaviy yo‘qotishlari $100 mlrdgacha yetishi mumkinligini taxmin qilmoqda.
