Aleksandr Filippovich Uzum Bank boshqaruvi raisi lavozimidan ketmoqda. Bu haqda Korporativ axborot yagona portalida ma’lum qilindi.
6-fevral kuni bank kuzatuv kengashi bir ovozdan boshqaruv raisi Filippovich Aleksandr Aleksandrovichning vakolatlarini muddatidan oldin tugatish to‘g‘risida qaror qabul qildi.
Uning o‘rniga ilgari “Yangi Bank” boshqaruv raisi lavozimida ishlagan Xe Svetlana Zexenovnani tayinlash taklif qilinmoqda. Yangi nomzod Markaziy bank tomonidan tasdiqlanishi kerak.
“Uzum Bank” Aleksandr Filippovichni affillangan shaxslar ro‘yxatidan chiqarib tashladi va boshqaruv raisi lavozimiga Svetlana Xeni kiritdi.
Tomonlarning kelishuviga ko‘ra, Aleksandr Filippovich regulyator bilan Xe Svetlana nomzodi kelishilgunga va u bilan bank bilan belgilangan tartibda mehnat shartnomasi tuzilgunga qadar “Uzum Bank” raisi vakolatlarini amalga oshiradi. Svetlana Xe nomzodini ko‘rib chiqish yakunlari bo‘yicha Markaziy bank kuzatuv kengashi yig‘ilishi o‘tkaziladi.
Svetlana Xe. Foto: Ilya Semendeyev / Spot
“„Uzum Fintech“ jamoasi bilan birgalikda bank boshqaruvining yangi raisi kompaniyaning uzoq muddatli strategiyasini kuchaytirishga va O‘zbekiston mijozlari va tadbirkorlari uchun ilg‘or fintech xizmatlarini ishlab chiqishga e’tibor qaratadi,” — deya xabar berdi “Uzum Bank” “Spot"ga.
Bank matbuot xizmatining ta’kidlashicha, Svetlana Xe korporativ boshqaruv, mijozlar va biznes uchun xizmatlar va mahsulotlarni rivojlantirishga e’tibor qaratgan holda bank sohasida 20 yillik tajribaga ega. Bungacha u “Yangi bank” boshqaruvi raisi, shuningdek, “Octobank” va “Kapitalbank"da rahbarlik lavozimlarida ishlagan.
Aleksandr Filippovich 2023-yilning avgust oyida “Uzum Bank” boshqaruvi raisi lavozimiga tayinlangan edi. U bu lavozimda 2019-yildan beri raqamli bankni boshqarib kelgan Sergey Gimadiyevning o‘rnini egallagandi.
Filippovich bank sohasida 20 yildan ortiq vaqt faoliyat yuritmoqda. Shu davr mobaynida u Belarusning yirik banklarida rahbarlik lavozimlarini egallab, biznesni rivojlantirish va xalqaro hamkorlar bilan aloqalarni yo‘lga qo‘yish masalalariga mas’ul bo‘lgan.
Avvalroq “Spot” Markaziy bank ustav kapitalini oshirmagan 2 ta bankning aktiv operatsiyalarini cheklagani haqida yozgandi.
2025-yildan banklarning eng kam ustav kapitali 500 mlrd so‘mni tashkil etishi kerak. Jami 4 ta bank bu talabni bajarmagan.
