Gamburg sudi Germaniyaning “Tagesspiegel” gazetasiga tadbirkor Alisher Usmonov haqida yolg‘on ma’lumotlar tarqatishni man etdi. Bu haqda “TACC” nashri xabar berdi.
Qayd etilishicha, ushbu bayonotlar Yevropa Ittifoqining Usmonovga qarshi sanksiyalarini asoslash va Germaniyada unga nisbatan olib borilayotgan tergov doirasidagi shubhalar uchun asos sifatida foydalanilgan.
2024-yil noyabr oyida “Tagesspiegel” nashri Andrey Popovning “Germaniya muxlisi va Putinning do‘sti: rossiyalik oligarx Alisher Usmonov kim?” maqolasini e’lon qildi.
Mazkur maqolada biznesmen haqida ko‘plab asossiz ayblovlar keltirilgan bo‘lib, ular orasida uning go‘yoki Germaniyada mulklari borligi to‘g‘risidagi da’volar ham o‘rin olgan edi.
“Nashr Alisher Usmonovning advokatidan xat olgandan so‘ng, maqolani o‘chirib tashladi, biroq bu da’volarni kelgusida tarqatishdan bosh tortmadi. Shundan so‘ng, Usmonov Gamburg yer sudiga sud taqiqi to‘g‘risida ariza taqdim etdi. Sud uning dalillariga qo‘shildi va hatto og‘zaki tinglov o‘tkazmasdan ham uning foydasiga qaror chiqardi”, — deb ta’kidladi tadbirkor vakili.
Sud nashrga Usmonovning o‘z aktivlarini noqonuniy yo‘l bilan qo‘lga kiritgani haqidagi da’volarni tarqatishni taqiqladi.
Tadbirkorning o‘zi davlat mulkini xususiylashtirishda ishtirok etmaganini va barcha aktivlarini ochiq bozorda raqobatli shartlar asosida sotib olganini bir necha bor ta’kidlab kelgan.
Shuningdek, sud Usmonovga tegishli deb taxmin qilinayotgan Bavariyaning Tegernze ko‘lidagi ko‘chmas mulk hamda “Dilbar” yaxtasi haqidagi asossiz ma’lumotlarni tarqatishni ham man etdi.
Bundan tashqari, sud nashrning rossiyalik tadbirkor ko‘p yillar davomida Bavariyaning Rottax-Egern shahrida yashagani to‘g‘risidagi da’vosini tadbirkorning shaxsiy huquqlarini buzuvchi va isbotlanmagan deb topdi.
Avvalroq “Spot” Germaniyada Alisher Usmonov yashagan villa 25 mln yevroga sotuvga qo‘yilgani haqida yozgandi.
Ko‘chmas mulk savdosi haqidagi ma’lumotlarni to‘plovchi Immowelt internet-portali ma’lumotlariga ko‘ra, ushbu obyekt Germaniyadagi eng qimmat ko‘chmas mulkka aylandi.
2024-yilda Gamburg sudi “Tegernseer Stimme” gazetasiga “USM” asoschisi Alisher Usmonov Bavariyada villaga egalik qiladi degan da’voni tarqatishni taqiqlagandi.
Taqiqni buzgan har bir holat uchun sud 250 ming evrogacha jarima soladi, agar bunday jarimani undirish imkoni bo‘lmasa, sudlanuvchi har bir qoidabuzarlik uchun olti oygacha va jami ikki yilgacha ma’muriy hibsga olinishi mumkin.
Usmonovning advokatlari gazetani 2017-yilda chop etilgan maqola yuzasidan sudga bergan edi, unda tadbirkor bir yil davomida Tegernsi ko‘lida “katta villaga ega bo‘lgani haqida mish-mishlar tarqagan”.
Shuningdek, Gamburg sudi “Forbes"ning Alisher Usmonov haqidagi iborasini obro‘sizlantirish deb baholagan edi.
Qayd etilishicha, go‘yoki milliarder Putin uchun “boshqacha rol o‘ynagan” va bu Yevropa Ittifoqi sanksiyalarni qo‘llashiga olib kelgan.
2023-yilning avgustida Gamburg sudi Alisher Usmonov haqidagi “Putinning sevimli oligarxi” degan gaplarni tuhmat, deb topgandi. Sud qo‘llanilgan ta’rifni asosli emas deb topdi, garchi bu ibora rossiyalik tadbirkorga qarshi Yevropa sanksiyalarini asoslash uchun foydalanilganiga qaramay, bu haqda hech qanday ochiq dalil mavjud emasdi.
Alisher Usmonov Rossiya va Ukraina o‘rtasida harbiy harakatlar boshlanganidan bir necha kun o‘tib Yevropa Ittifoqi, AQSh va Buyuk Britaniya sanksiyalariga uchragan.
Biroq, AQSh moliya vazirligi maxsus bosh litsenziyaga ega bo‘lgan rossiyalik milliarderning kompaniyalarini sanksiyalardan chiqarib tashladi.
2022-yilning iyulida Usmonov “USM” kompaniyalarining bankrot bo‘lish xavfini keltirib, YeI sanksiyalariga sud orqali eʼtiroz bildirishga uringani maʼlum bo‘ldi. Sentabr oyida Vengriya rasmiylari tadbirkorni sanksiyalar ro‘yxatidan olib tashlashni talab qilgan, biroq tez orada o‘z talabini qaytarib olgan.
Biroz vaqt o‘tgach, YeI milliarderning singlisi Saodat Nurzievaga nisbatan cheklovlarni olib tashladi. Noyabr oyida OAVda O‘zbekiston hukumati Usmonovga qarshi sanksiyalarni bekor qilishni so‘rab YeIga murojaat qilgani va unga huquqiy yordam taklif qilgani haqida xabarlar tarqalgandi.
Usmonov 2023-yil avgustida Germaniya Federal Konstitutsiyaviy sudiga 2022-yil kuzida Bremen portida “Dilbar” superyaxtasida tintuv o‘tkazilgani munosabati bilan da’vo arizasi bilan murojaat qildi. Biroq, sud tadbirkorning da’vosini qabul qilmadi.
Noyabr oyida Frankfurt-Mayn sudi o‘tgan yilning kuzida musodara qilingan hujjatlar va mol-mulkni “USM” xoldingi asoschisiga qaytarishni buyurdi.