“1Fit” — Qozog‘iston startapi bo‘lib, unga 2018-yilda asos solingan. Bugungi kunda ilova beshta mamlakatda: Qozog‘iston, O‘zbekiston, Ozarbayjon, Malayziya va Meksikada muvaffaqiyatli faoliyat yuritmoqda.
“1Fit” — odamlarga bitta abonement orqali turli sport zallari va studiyalarini topib, tashrif buyurishga ko‘mak beradigan xizmat hisoblanadi. Umumiy olib qaraganda bu sport bilan shug‘ullanishni istovchi, lekin bir joy yoki faoliyat turi bilan cheklanishni xohlamaydigan kishilar uchun mo‘ljallangan platforma.
“Bu juda qulay, chunki bitta abonementda boksdan tortib suzish, raqs va yogagacha bo‘lgan turli xil sport turlari jamlangan. Istalgan sport turlarini birlashtirish va bitta joyga bog‘lanib qolmasdan, shaharning istalgan qismidagi mashg‘ulotlarga yozilish mumkin”, — deb ta’kidlaydi “1Fit” kompaniyasining bosh direktori Murat Alixanov.
O‘zbekistonda ushbu xizmat 2022-yilning yozida ishga tushirilgan. Bugungi kunda kompaniya 438 ta zal va studiyalar bilan hamkorlik qilmoqda.
Murat Alixanov “Spot"ga bergan intervyusida startap g‘oyasi qanday paydo bo‘lgani, loyihani moliyaviy ko‘maksiz qanday rivojlantirgani hamda hozirda reklamaga qancha mablag‘ sarflayotgani va nima sababdan xizmat lyuks klassdagi zallar bilan hamkorlik qilmayotgani haqida so‘zlab berdi.
Codebasters’ning 1Fit'ga aylanishi
Bundan bir necha yil avval biz “Codebasters” kompaniyasi edik: boshqalar uchun ilovalar hamda veb-saytlar ishlab chiqish bilan shug‘ullanardik. Bir kuni dasturchilarimizning 80%ini band qilgan yirik mijozimiz birdaniga hamkorlikni to‘xtatdi, shunchaki g‘oyib bo‘lib qoldi. Mijozlar bilan tuzilgan shartnomadan keladigan foyda xodimlarimizni bir necha oy davomida maosh bilan ta’minlashi kerak edi.
O‘shanda bizda bo‘sh qolgan ishchi kuchimiz bo‘lgan, ularni ish bilan band qilishimiz mumkin edi. Yosh mutaxassislarga dasturlashni o‘rgatadigan loyiha yaratish yaxshi g‘oya bo‘lishi mumkin, deb o‘yladik. Shu bilan birga, faqatgina kod yozish emas, balki to‘laqonli mahsulot ishlab chiqish bo‘yicha mahoratimizni oshirishimiz mumkin edi.
Markaziy Osiyoda o‘zgacha IT-mahsulotlar kamdan-kam hollarda uchraydi — bu hammaga ma’lum fakt. Odatda chet elda qandaydir qiziqarli loyihani ko‘ramiz, ilhomlanamiz va shunga o‘xshash mahsulot yaratishga harakat qilamiz. “1Fit” loyihasi bilan hammasi xuddi shunday bo‘lgandi: o‘zim uchun qiziqarli, texnik jihatdan amalga oshirish oson bo‘lgan g‘oyalarni qidirardim. Murakkab yechimlarni talab qilmaydigan tushunarli narsani yaratishga harakat qilganman.
Fitnes sohasini o‘zimga juda yaqin bo‘lgani uchun tanlaganman. O‘sha paytda vaznim oshgan, sport bilan faol shug‘ullanishni to‘xtatgan va ko‘p ovqatlanadigan bo‘lib qolgandim. Uzoq vaqt davomida bitta sport turi bilan shug‘ullana olmasligimni hisobga olib, bir abonement orqali turli xil sport turlarini birlashtirish g‘oyasi juda qiziqarli tuyuldi. Buni amalga oshirish unchalik qiyin emasday ko‘rindi, shuning uchun jamoam bilan birgalikda ushbu loyihani yaratishga qaror qildik. Bundan tashqari, yagona abonementlar tizimi allaqachon Rossiya, Amerika, Yevropa va Janubi-Sharqiy Osiyoda ommalashgandi.
Potensial foydalanuvchilarning ehtiyojlarini chuqurroq o‘rganish uchun odamlar orasida so‘rovnoma o‘tkazdik, ularni tom ma’noda ko‘chada to‘xtatib savol-javob qilgandik. Mashg‘ulotlarning har xil turlarini birlashtirish va turli joylarga tashrif buyurish qanchalik muhimligini aniqlash uchun savollar ro‘yxatini tayyorladik. Platforamadan foydalanish bizga qulaydek tuyulsa-da bu haqida odamlarning fikrini eshitish biz uchun muhim edi.
Foydalanuvchining user personа'ni aniqlaganimizdan so‘ng, qolgan jarayonlar tezlashdi. Birinchi kodni yozishdan to mobil ilovani ishlab chiqish va yopiq sinovgacha ikki oy vaqt sarfladik. Ishlab topgan barcha pullarimizni — taxminan $500 mingni “Codebasters"ga sarmoya sifatida kiritdik.
2021-yilda “TMT Investments” fondi bizga xuddi shuncha sarmoya kiritdi. 2023-yildagi yangi investitsiya raundi doirasida ular o‘z sarmoyalarini yana takrorladilar. Loyihaga Estoniyaning “Capital Mill” jamg‘armasi tomonidan qo‘shimcha $100 ming yo‘naltirildi, $400 dan sal ko‘proq mablag‘ esa dunyoning yetakchi IT-kompaniyalarida ishlaydigan qozog‘istonlik digital-nomadlar sindikatidan kelib tushdi.
Taxminan bir yil o‘tgach, loyihani moliyalashtirishni to‘xtatdik: chunki yetarli miqdorda daromad kela boshlagandi. Tushgan mablag‘larni loyihaning o‘ziga qayta investitsiya qildik. Umumiy miqdorda $1,7 mln sarmoya kiritildi.
Platforma yaratilgandan so‘ng, mashg‘ulot zallari va studiyalarga bordim. Hech qanday obro‘ va ishonchga ega bo‘lmasdan turib, biznesni hamkorlikka ko‘ndirish juda qiyin kechdi. Ustiga-ustak, Qozog‘istonda o‘sha paytda bizni chalkashtirib yuboradigan chegirmali xizmatlar ommalashgandi. Gohida kimligimiz, qanday xizmatni taklif qilayotganimizni bir necha soatlab tushuntirardik. Natijada, biz 20ta zal va studiyalar bilan iloyihani ishga tushirdik.
Ilk tijoriy kundayoq abonementlarni sotishga muvaffaq bo‘ldik, kutilgan natijaga erishgandik. 100dan ortiq odamni o‘z ichiga olgan fokus-guruhimiz a’zolari orasida obuna bo‘lishga qaror qilganlar ham topildi. Hamkorlarimiz uchun faollik hissini yaratish va sport zallariga tashrif buyurilayotganini ko‘rsatish uchun ofis xodimlaridan mashg‘ulotlarga faol qatnashishlarini so‘radik.
Noodatiy targ‘ibot
Avvaliga budjet yo‘qligi sabab nostandart usullar bilan oldinga siljishga harakat qildik. Hozir kamtarroq bo‘ldik deb aytolmayman, lekin o‘sha paytda bizning marketingimiz haqiqatan ham g‘ayrioddiy bo‘lgan. Doimiy ravishda natijalarni tahlil etib, kommunikatsiyaning eng samarali va kam xarajatli usullarini izladik. Shunday xulosaga keldikki, eng yaxshi vosita odamlarda kuchli his-tuyg‘ularni uyg‘otadigan, xotirada uzoq vaqt saqlanadigan va ularni o‘z-o‘zidan ma’lumot tarqatishga undaydiganidir.
O‘shanda men “1Fit"ning har bir nashri rezonansga sabab bo‘lishi kerak, degan tamoyilga amal qilardim. Odamlarni semiz deyishimiz ham mumkin edi. Ehtimol, bu unchalik haqoratli tuyulmagandir, chunki ularni men ham semiz vaqtim yozganman (kuladi). Bu Amerikadagi vaziyatga o‘xshaydi: N harfi bilan boshlanadigan so‘zni faqat N vakillari aytishi mumkin bo‘lganidek.
Esimda, “Irina Kayratovna"ni ham reklamaga ham jalb qilganmiz. O‘shanda guruh ishtirokidagi videorolik $500 ga tushgan. Guruh a’zolaridan biri bilan tanish edim va ular biz bilan hamkorlikka rozi bo‘lishdi. Hozirgacha men ulardan minnatdorman, biz faqat kamera va uning linzalari ijarasiga mablag‘ sarf qildik. Kreativ bo‘lishga harakat qildik, biz haqimizda bilishlarini ta’minlash imkoniyatlarini izladik. Keyinchalik, mablag‘ paydo bo‘la boshlagach, marketing kampaniyalarini ishga tushirdim.
Ba’zida ko‘pchilik bizning reklamalarimizdan bezor bo‘lganini eshitamiz, shuning uchun Qozog‘istonda tajriba o‘tkazishga qaror qilindi: marketing budjetini ikki baravar kamaytirdik va daromad biroz pasayganini payqadik.
Bu bozorning yuqori darajada to‘yinganligi bilan izohlanadi. Shuning uchun daromad va kengayish imkoniyati o‘rtasidagi muvozanatni topish uchun xarajatlarni optimallashtirishga harakat qildik. Hozirda “1Fit” reklamasiga qo‘yilgan mablag‘ oyiga taxminan $800 ming bo‘lib, butun dunyo bo‘ylab mizojlarimiz soni 108 mingni tashkil etadi.
Ayni paytda kompaniyaning aylanmasi $40 mlnga teng. Eng qizig‘i, hech qachon o‘zini o‘zi qoplash darajasini o‘lchamaganmiz, chunki biz uchun loyihaning o‘sishi ustuvor ahamiyat kasb etadi. Startapning rivojlanishi o‘zini qoplash yoki foyda olish haqida emas, balki qiymat yaratish va kengayish haqida. Investorlar bir necha yildan so‘ng ularning ulushi bir necha barobar oshishini hisobga olgan holda kompaniyaga mablag‘ kiritadilar. Keyin, yangi investorlar kelishi bilan ular o‘z ulushlarini foyda bilan sotishlari mumkin bo‘ladi.
Startaplar klassik biznesga qaraganda boshqacha ishlaydi. Misol uchun, agar siz go‘sht sotish bilan shug‘ullanayotgan bo‘lsangiz, birinchi kundanoq o‘zini qoplash va foyda olishni hisobga olishingiz kerak: fermani qurish, kapital qo‘yish va investitsiyalarni qaytarish. Startap holatida esa bu venchur model bo‘lib, unda asosiy e’tibor darhol qoplanishga emas, balki kompaniyani rivojlantirish va qiymatini oshirishga qaratilgan.
O‘zbekiston bozori va “1Fit”
Loyihani birinchi marta xalqaro miqyosda Piterda ishga tushirganmiz, u yerda hammasi yaxshi ketayotgandi. Ammo urush boshlandi: Rossiya bozoridan chiqish to‘g‘risidagi qaror Ukrainada jangovar harakatlar boshlangan kuni qabul qilindi. Birinchi navbatda, bu vijdon masalasi: kompaniyamiz to‘lagan soliqlar harbiy tajovuzni qo‘llab-quvvatlashga sarflanishini qabul qila olmasdik. Shuningdek, Rossiyadagi ofisda urushga qarshi bo‘lmagan odamlar ishlagani bizni hayratda qoldirdi, men uchun jamoani umumiy qadriyatlar birlashtirishi muhim. Bundan tashqari, Rossiyada ishlashni davom ettirish obro‘ga putur yetkazishi mumkin edi.
Yurtimizga qaytgach, loyihani boshqa mamlakatlarda ishga tushish istagi tug‘ildi. Shu o‘rinda biz yaqin qo‘shnimiz — O‘zbekistonni ko‘z oldimizga keltirdik. Madaniyatimiz juda o‘xshash bo‘lgani uchun umumiy tanishlarni topib, maslahatlashish imkoniyati paydo bo‘lishi mumkin edi.
Bir oydan so‘ng hamkorim bilan Toshkentga keldik, mahalliy tadbirkorlar bilan uchrashuvlar o‘tkazib, mahalliy bozor qanday ishlayotganini o‘rgana boshladik. Bu yer bizga istiqbolli bo‘lib ko‘rindi va loyihani aynan shu yerda sinab ko‘rishga qaror qildik: bir oy farq bilan Toshkent va Bishkekda startapni ishga tushurdik.
Ishga tushirish ancha tez va dadil o‘tdi. Hamkorlarni yig‘ish uchun ikki oy, loyihani ishga tushirish uchun esa bir necha o‘n ming dollar kerak bo‘ldi. Qozog‘istonda uch yil faoliyat yuritganimizni hisobga olganda, bizda tajriba va zal egalari bilan kelisha oladigan odamlar bor edi. Bundan tashqari, Qozog‘iston bilan madaniy va til yaqinligi bizga qo‘l keldi: o‘zbek tili ancha o‘xshash bo‘lib, muloqot, muzokaralar va ishontirish jarayonini osonlashtirdi. Shu tufayli ishni tashkil etishimiz osonlashdi.
Foto: Jaloliddin Rajabov / Spot
Shuningdek, tajriba sifatida mahalliy xodimlarni ishga olishga qaror qildik. Hozir Toshkentdagi ofisda 95 kishi ishlaydi. Bizda nomzodlar bilan barcha suhbatlar shaxsan ta’sischilar tomonidan o‘tkaziladi: xodimlarning qadriyatlari kompaniya qadriyatlariga mos kelishi muhim, deb hisoblaymiz. Bu ishonch muhitini yaratib, bu yerda har bir kishi hatto ziddiyatli vaziyatlarda ham o‘zligini yo‘qotmaslik imkoniyatini beradi.
Ziddiyatlar bo‘lishi aniq va bu normal holat. Ammo bunday vaziyatlarda umumiy qadriyatlarsiz kelishuvga erishishning deyarli iloji yo‘q. Masalan, agar inson adolatni qadrlasa, men esa o‘z manfaatlarim yo‘lida harakat qilishni afzal ko‘rsam, unda biz til topisha olmaymiz. Bunday vaziyatda adolatli qarordan qochish uchun cheksiz bahonalar izlashim mumkin.
Ishni boshlash paytida bizda 150ta zal va studiya bo‘lgan. Qozog‘istonda qanday konsepsiyani qo‘llagan bo‘lsak uni o‘zgartirmasdan ishlatdik: Qozog‘iston, O‘zbekiston, Meksika va Malayziyada muvaffaqiyatli ishlayotgan yagona yondashuvni saqlab qolish muhim. Bu samaradorligini isbotlagan standartlashtirilgan jarayon.
Shartli ravishda premium segmentdagi zallar bilan ishlashga kelsak, istisnolar deyarli yo‘q. Agar biz “Befit” kabi zallar bilan hamkorlik qilsak, demak, ular bizning narx siyosatimizga mos keladi yoki bizning shartlarimizga rozi. Biroq tarmog‘imizda boshqa premium-zallar yo‘q, faqat ekonom yoki biznes segmentiga yaqinroq. Men boshqa premium zallar tarmog‘i bilan kelishuv o‘tkazishga harakat qildim, ammo muvaffaqiyatsiz bo‘ldi. Ularning egasi bilan bog‘langanimda, menga juda qo‘pol tarzda javob qaytarishdi. Bu tajriba menga kim bilan hamkorlik qilishga tayyormiz-u, kim bilan hamkorlik qilmasligimizni tushunishimni tasdiqladi, xolos.
O‘zbekistonda ishlashning nozik jihatlari
O‘zbekiston bozori bizga o‘zimizga bo‘lgan ishonchni yanada oshirdi. U xalqaro bozorlarda muvaffaqiyatga erishishimiz mumkinligini ko‘rsatdi: O‘zbekiston oylik sotuv hajmi $1 mlnga yetgan birinchi bozor bo‘ldi. Toshkentdagi yarim yillik faoliyatning o‘zidayoq, startap o‘zini operatsion jihatdan — ish haqi, ofis ijarasi va marketing xarajatlarini qoplay boshladi. Hozirda faqat marketing o‘ziga $100 ming sarflaymiz. Ijodkor, videograf va moushen bilan shug‘ullanuvchi xodimlarni o‘z ichiga olgan roliklar tayyorlaydigan uch kishilik jamoamiz bor.
O‘zbekiston umumiy foydaning 12%ini tashkil etadi. Bu yerdan kelib tushgan mablag‘larni Malayziya va Meksikada faoliyatimizni boshlash uchun sarfladik. Marketing bo‘limimiz O‘zbekistonda joylashgan.
Biz uchun bozorning asosiy farqlaridan biri muddatli to‘lovlardan foydalanishdir. “Uzum Nasiya”, “Alif” va “Paylater” kabi xizmatlar bilan faol hamkorlik qilyapmiz. Biroq O‘zbekistonda bu sohadagi qonunchilik Qozog‘istonnikidan farqlanadi. Masalan, agar bir kishi kredit yoki bo‘lib to‘lash sharti bilan qarz olib, to‘lovni to‘xtatsa, uning qarzini boshqa undiruvchilarga sotish mumkin emas.
Qozog‘istonda bunday imkoniyat mavjud bo‘lib, bu banklar uchun xatarlarni kamaytiradi va past foiz stavkalarini belgilash imkonini beradi. O‘zbekistonda esa, aksincha, xatarlar yuqori, shuning uchun stavkalar va jarimalar ancha yuqori. Bu mijozlarga abonementlarni bo‘lib to‘lash imkoniyatini beruvchi xizmatlar bilan hamkorlik qilish xarajatlarimizni oshiradi.
Bozor segmentatsiyasi ham farqlanadi. Qozog‘istondagi ekonom segment Toshkentga nisbatan ancha rivojlangan va keng qamrovli tuyuladi. Bu yerda sport zallari va studiyalarning narxlari Qozog‘istondagiga qaraganda sezilarli darajada yuqori.
Mavsumiy farqlar ham yaqqol ko‘zga tashlanadi: O‘zbekistonda yozda, ehtimol issiqlik tufayli, suv sporti yoki akvaparklar ommalashgan. Qozog‘istonda esa yoz mavsumida, aksincha, faollikning pasayishi kuzatiladi, chunki ko‘pchilik chet elga sayohat qiladi. Biz har bir bozorda ishlayotganimizda ana shu xususiyatlarni inobatga olamiz.
Agar sport madaniyati va sog‘lom turmush tarzining rivojlanishini ko‘rib chiqadigan bo‘lsak, Qozog‘iston va O‘zbekistonda sport bilan shug‘ullanish, abonement sotib olishga qiziqish Malayziya yoki Meksikaga qaraganda ancha past ekanligini ta’kidlash mumkin, bu esa motivatsiya va sport odatlaridagi farqlarni aks ettiradi. Hududlarda sinovdan o‘tkazdik, ochig‘i, uddalay olmadik. Fitnes u yerda go‘yo hali ham embrion holatida.
Hamkorlarimizdan tez-tez yangi mijozlarni jalb qilish orqali bozorni o‘zgartirayotganimiz haqida fikr-mulohazalar olamiz. Eng muhim yutuqlarimizdan biri shuki, abonementlarimizni xarid qilayotgan mijozlarning 70%i birinchi marta sport bilan shug‘ullanishni boshlamoqda. Mening fikrimcha, bu marketingimiz mevasi. Masalan, hech qachon sport bilan shug‘ullanmagan, ammo boshlashga qaror qilgan qizni tasavvur qiling. Reklamalarimiz hamma joyda va doimo ko‘z oldida bo‘lganini hisobga olsak, u o‘zining dastlabki mashg‘ulotlari uchun aynan bizni tanlashini taxmin qilish qiyin emas.
Vaqt o‘tishi bilan loyiha tufayli zal yoki studiya egalari yangi joylarni ochishdi, chunki biz tashriflar va joylashuvlar bo‘yicha statistikani ko‘ramiz. Bundan tashqari, ularga bepul maslahat beramiz, bu olti yildan beri amal qilib kelayotgan siyosatimizning bir qismi hisoblanadi. Kompaniya mavjud bo‘lgandan beri hech qachon hamkorlardan pul olmaganmiz — aksincha, biz ularga pul to‘laymiz.
Foto: Jaloliddin Rajabov / Spot
Ilova orqali hamkorlarimizda pul ishlashning turli usullari mavjud, masalan, ular bizga ilova orqali loyihani targ‘ib qilish yoki boshqa xizmatlarni taklif qilish mumkin, lekin biz buni prinsipial ravishda qilmaymiz. Bu yondashuv boshidayoq e’lon qilingandi va hozirgacha o‘zgarishsiz qoldi.
Zallarga haq to‘lash oyiga bir marta amalga oshiriladi. Har bir tashrif uchun bitta abonement bo‘yicha ma’lum miqdorda mablag‘ hisoblanadi: oy davomida jamlab borilib, hisobot davri tugagandan so‘ng to‘lanadi. Barcha shartlar, shu jumladan, stavka ham zal egalari bilan oldindan kelishib olinadi.
Boshqa mamlakatlarda rivojlanish
Ilgari Dubay va London bozoriga chiqishga harakat qildik, ammo ishga tushirilgandan bir muncha vaqt o‘tgach, bu bozorlardan ketishga majbur bo‘ldik.
Londondan so‘ng, yondashuvimizni qayta ko‘rib chiqdik: yangi bozorlarga chiqish uchun mamlakatlarni yanada aniqroq tanlashni boshladik. Endi bizda bozorga kirishda qat’iy mezonlar mavjud. Masalan, hozir makroiqtisodiyot va demografiyaga e’tibor qaratamiz — biz uchun iqtisodiyotning o‘sishi va aholi sonining ko‘payishi muhim ahamiyatga ega. Shuningdek, Markaziy Osiyoda muvaffaqiyatli ishlayotgan modelni joriy qilish mumkin bo‘lgan mamlakatlarni tanlashga qaror qildik.
2023-yil 3-sentyabrda Bokuda loyihani ishga tushurdik. Ozarbayjonni uning bozori bizning sharoitimizga mos kelgani uchun tanladik. Umuman olganda, Toshkentdagi tajriba bizni boshqa mamlakatlarga ham borishga ilhomlantirdi. Boku 2 mlndan ortiq aholi yashaydigan katta shahar bo‘lib, ular orasida yosh va to‘lov qobiliyatiga ega bo‘lganlar ko‘p. Biz Tbilisi haqida ham o‘ylagandik, lekin bu fikrdan qaytdik, chunki u yerda aholi keksayib bormoqda, negaki, maqsadli auditoriyamiz yoshlarni tashkil qiladi.
Bokuda ishga tushirish uchun tayyorgarlik ko‘rishga ikki oy vaqt sarfladik. Bu vaqt ichida bozorni o‘rganib chiqib, 50ta fitnes zalini uladik. Hozirda hamkorligimizda 125ta sport zali mavjud.
Endi Malayziyaga to‘xtaladigan bo‘lsak. Bu yerda bir necha sabablarga ko‘ra turibmiz. Birinchidan, Malayziya nimasi bilandir Qozog‘istonga o‘xshaydi. Masalan, sport narxlari taxminan bir xil, sheriklarga to‘lovlar ham shunga o‘xshash. Ammo asosiy farq shundaki, yirik shaharlarda aholining taxminan 50%ini o‘rta sinfga kiritish mumkin. Bu bizdagiga qaraganda ancha ko‘p: shunga mos ravishda to‘lov qobiliyatiga ega auditoriya ham ko‘proq.
Ikkinchidan, Malayziya xarajatlar va kommunikatsiya jihatidan qulay. Bu yerda ingliz tilida so‘zlashuvchilar ko‘p, bu esa ishmizni osonlashtiradi. Masalan, biz Janubi-Sharqiy Osiyodagi boshlang‘ich maydon sifatida ko‘rib chiqqan Tailandda bu jarayon qiyinroq.
Loyihani Malayziyada fevral oyida ishga tushirdik, dastlab o‘sish sekin bo‘ldi. Ishni 13ta zal bilan boshlagandik, keyin ularning sonini 50taga yetkazdik, shundan keyingina mijozlar faol kela boshladi. Hozir bizda 477ta sport zal va studiyalar bor. Moliyaviy natijalar ham quvonarli: birinchi oyda daromad atigi $121 bo‘lgan bo‘lsa, oktyabr oyida bu ko‘rsatkich $167 mingni tashkil etdi.
Meksika. Bu mamlakat mas’uliyatlimdagi hudud bo‘lib, u yerda bir yildan beri yashayman. Avgust oyida bozorga chiqqan bo‘lsak birinchi oyning o‘zidayoq daromad $115 mingdan oshdi. Qizig‘i shundaki, Meksikada loyihani poytaxtdan emas, ikkinchi yirik shahar — Gvadalaxaradan boshladik. Bu bizning mahsulotimiz qanchalik talabgir ekanligini tezda sinab ko‘rishga yordam berdi.
Meksikadagi ishga tushirish kompaniya tarixidagi eng muvaffaqiyatli voqea bo‘ldi. Bugungi kunda 608ta sport zal bilan hamkorlik qilib, faol o‘sishda davom etyapmiz.
Rejalar. Maqsadimiz — boshqa mamlakatlarda kengayish uchun daromad topish bo‘lib, loyiha o‘sishini va bir kun kelib Markaziy Osiyodan chiqqan birinchi “yakkashox” bo‘lishni istaymiz. “Uzum” yoki “Kaspi” kabi o‘zini startap deb ataydigan, lekin aslida bunday bo‘lmagan kompaniyalar haqida gapirmayapmiz.
Biz oddiy odamlar tomonidan kichik ofisda yaratilgan startapmiz va biz uchun o‘z mahsulotimizni Markaziy Osiyodan tashqariga olib chiqish muhim ahamiyatni kasb etadi.
