Markaziy bankning rasmiy veb-saytida “Inflyatsiya kalkulyatori” ishga tushirildi. Bu haqda regulyator matbuot xizmati xabar berdi.
Mazkur kalkulyator yordamida ma’lum ixtiyoriy vaqt oralig‘ida inflyatsiyaning pul qiymatiga (sotib olish qobiliyatiga) ta’sirini baholash mumkin.
Buning uchun kerakli davr va pul miqdori tanlab olinadi, undan keyin iste’mol savatchasidagi tovar va xizmatlarning inflyatsiyaga moslashtirilgan qiymati hisoblanadi.
Ma’lumotlar Statistika agentligi tomonidan hisoblangan iste’mol narxlari indeksining oylik hisoboti asosida taqdim etiladi.
“Inflyatsiya kalkulyatori” veb-saytning bosh sahifasi hamda “Pul-kredit siyosati” bo‘limida joylashgan.
Shuningdek, kalkulyator belgilangan davr uchun quyidagi ma’lumotlarni hisoblaydi:
- yig‘ilgan inflyatsiya (foizda);
- davr uzunligi;
- o‘rtacha oylik inflyatsiya (foizda);
- o‘rtacha yillik inflyatsiya (foizda).
Xususan, 1999-yilning dekabr oyidan boshlab, hozirgi vaqtgacha bo‘lgan davr uchun pul miqdorining yakuniy narxini aniqlashi mumkin. Masalan, 1999-yilning so‘nggi oyida 100 ming so‘m bo‘lgan iste’mol savati qiymati 2025-yilning yanvar oyida 1 mln 233 ming 914 so‘mga teng bo‘ladi.
Avvalroq Markaziy bank mikroqarzlarning to‘liq qiymatini cheklashni rejalashtirayotgani haqida xabar berilgandi. Mikroqarzlar bo‘yicha cheklangan stavka kuniga 0,3% dan 0,25% gacha pasaytirilmoqda. Muddatli to‘lav va lizing qarz yuki ko‘rsatkichida hisobga olinadi.
