Avvalroq Shavkat Mirziyoyev raisligida Korrupsiyaga qarshi kurashish bo‘yicha milliy kengashning korrupsiyaning oldini olishdagi ishlar natijadorligi va kelgusidagi vazifalarga bag‘ishlangan yig‘ilishi o‘tkazilayotgani haqida xabar berilgandi.
Unda prezident Korrupsiyaga qarshi kurashish agentligi faoliyatidan mutlaqo noroziligini bildirdi.
“Agentlik xodimlari vazirliklarga, hududlarga borib, aniq bir sohani tahlil qilib, muammolarga yechim berish o‘rniga, qo‘zg‘atilgan jinoyat ishlarini sanaydigan quruq statist bo‘lib qolgan”, -dedi davlat rahbari.
Agentlik rahbariyati korrupsiya holati eng ko‘p bo‘lgan tuman sog‘liqni saqlash, bandlik bo‘limi yoki bank filialiga borib, holatni o‘rganmagani, yangi tizim bo‘yicha taklif bermagani ko‘rsatib o‘tildi. Bu sohalarning bevosita rahbarlarining o‘z tizimini “korrupsiyadan xoli” qilish ishlari sustligi tanqid qilindi.
Prezident topshirig‘i bilan investitsiya dasturlari ustidan nazorat kuchaytirilganidan keyin 2024-yilda 3 trln so‘m iqtisod qilindi. Sog‘liqni saqlash tizimida “Situatsion markaz” ishga tushirilgani hisobiga 1,2 trln so‘mlik maqsadsiz xarajatlarning oldi olindi.
“Lekin, nega bu ishlar Prezident topshiriq berganidan keyin boshlanishi kerak?”, — deya savol qo‘ydi davlat rahbari.
Parlamentdagi budjet qo‘mitalarida ham har yili budjetdan eng ko‘p mablag‘ oladigan 3 ta vazirlikka borib, korrupsiyaviy omillarni aniqlashda va o‘zgarish qilishda tashabbuskorlik yetishmayotgani qayd etildi.
Bosh vazirga 117 ta vazirlik va idoradagi “korrupsiyaga qarshi ichki nazorat” tuzilmalari rahbarlarini ishdan olish va ularning o‘rniga halol, fidoyi va professional kadrlardan qo‘yish, ularni oldiga aniq vazifalarni belgilab berish topshirildi.
Vazirliklarning hududiy komplayens xodimlarini bevosita vazirni o‘zi ishga qo‘yishi, o‘ziga siyosiy mas’uliyat olib, butun tizimidagi korrupsiya uchun shaxsan javob berishi belgilandi.
Agentlikning ish uslubi o‘zgartiriladi. Tajriba tariqasida Sog‘liqni saqlash, Qurilish, Suv xo‘jaligi vazirliklari hamda “O‘zbekneftgaz” va “O‘zsuvta'minot"ning komplayens nazorati agentlikka o‘tkaziladi.
Yil yakuni bilan bu vazirliklarda qancha korrupsiyaviy omillarni bartaraf qilgani, odamlarga qanday yengilliklar bo‘lgani haqida Milliy kengashda hisobot beradi.
Shuningdek, agentlik vazir, hokimlar bilan birgalikda har chorakda korrupsiya yuqori bo‘lgan kamida 3 ta sohada tumangacha tushib, maishiy va tizimli korrupsiya omillarini chuqur o‘rganadi, tahlillar asosida qaysi jarayonni raqamlashtirish, qaysi byurokratik tartibni bekor qilish bo‘yicha aniq choralarni ishlab chiqadi.
Ikki oyda xalqaro reyting tashkilotlari tavsiyasi asosida “yo‘l xarita"si ishlab chiqilib, har bir vazirlik va idoraga qilinadigan ishlar aniq belgilab beriladi. Sustkashlikka yo‘l qo‘ygan rahbarlarni jazolash bo‘yicha taklif kiritiladi.
2023-yilning noyabrida qabul qilingan prezident farmoni bilan Aksilkorrupsiya agentligi davlat organlari va tashkilotlarining qayta aloqa tizimi samaradorligi darajasini baholashga qaratilgan tadbirlarni tashkil etishi belgilangandi.
