“Microsoft” kompaniyasi tibbiyot xodimlari uchun yangi sun’iy yordamchi “Dragon Copilot"ni e’lon qildi. Bu haqda “The Verge” nashri xabar berdi.
Uning asosiy vazifasi hujjatlarni avtomatlashtirish va ma’lumotlarni qidirish orqali shifokorlarning ish yuklamasini kamaytirish hisoblanadi. Shu orqali shifokor bemorlarga ko‘proq vaqt ajratishlari mumkin.
“Dragon Copilot” “Dragon Medical One” (ovozli qaydlar va kasallik tarixini yuritish) va “DAX Copilot” (tibbiy hujjatlarni avtomatlashtirish) texnologiyalarini birlashtiradi. Ikkalasi ham “Microsoft” 2021-yilda sotib olgan “Nuance Communications” tomonidan ishlab chiqilgan.
Sun’iy intellekt yordamchisi quyidagi imkoniyatlarni beradi:
- real vaqt rejimida tibbiy qaydlarni avtomatik yaratish va to‘ldirish;
- qabulning qisqacha yakunlari va tavsiyalarni shakllantirish;
- ma’lumotlarni ishonchli tibbiy manbalardan izlash;
- shifokorlarning so‘rovlariga javob berish;
- AQSh Kasalliklarni nazorat qilish va oldini olish markazlari kabi nufuzli manbalarga havola berish.
“Dragon Copilot” mobil ilova, brauzer va ish stolida ishlaydi. Xizmatni 2025-yil may oyida AQSh va Kanadada ishga tushirish rejalashtirilgan. Keyinchalik u Buyuk Britaniya, Germaniya, Fransiya va Niderlandiyada paydo bo‘ladi. “Microsoft' obuna narxini hozircha oshkor qilmadi.
Avvalroq “Spot” “Google” shifokorlarning tushunarsiz yozuvini shifrlash vositasini ishlab chiqqani haqida yozgandi.
Mazkur funksiya “Google Lens” ilovasida paydo bo‘lib, u orqali retseptdagi dori nomlarini topish mumkin.
