4-mart kuni maxsus iqtisodiy va sanoat zonalari faoliyatining samaradorligini oshirish bo‘yicha prezident farmoni qabul qilindi.
Hujjat bilan, 2025-yilda maxsus iqtisodiy zonalarda $2,3 mlrd miqdoridagi investitsiyalarni o‘zlashtirish, eksport hajmini $1 mlrdga yetkazish, ishlab chiqarish hajmini $4,3 mlrdga teng miqdorda ta’minlash va 12 mingta yangi doimiy ish o‘rinlarini yaratish belgilandi.
Shu bilan birga, sanoat zonalarida $800 mln miqdoridagi investitsiyalarni o‘zlashtirish, eksport hajmini $512,2 mlnga yetkazish, ishlab chiqarish hajmini $1,8 mlrdga teng miqdorda ta’minlash va 17 mingta yangi doimiy ish o‘rinlarini yaratish rejalashtirilgan.
Yangi barpo etiladigan ixtisoslashtirilgan zonalar faqat maxsus iqtisodiy zona yoki sanoat zonasi shaklida tashkil etiladi.
MIZlar faoliyati bo‘yicha faqat eksportga yo‘naltirilgan loyihalarga ixtisoslashgan, maydoni o‘ralgan maxsus eksport zonasi turida ham tashkil etilishi mumkin. Ularning faoliyat ko‘rsatish muddatiga oid cheklovlar bekor qilinadi.
Investitsiyalar, sanoat va savdo vazirligi maxsus iqtisodiy zonalarni boshqarish bo‘yicha vakolatli organ hisoblanadi hamda xususiy boshqaruvga berilgan zonalar faoliyatini muvofiqlashtiradi. Sanoat zonalari esa mahalliy ijro etuvchi hokimiyat organlari tomonidan boshqariladi hamda faoliyatini muvofiqlashtirish vazirlik tomonidan belgilanadi.
16-yanvar kuni Shavkat Mirziyoyev raisligida o‘tkazilgan videoselektor yig‘ilishida mamlakatda faqat eksportga ishlaydigan EIZlar tashkil etilishi ma’lum qilingandi. Farmon bilan Namangan viloyatida “Namangan” maxsus eksport zonasi tashkil etilishi belgilandi.
Joriy yilning 1-iyunidan MIZlar ishtirokchilari uchun mahsulot ishlab chiqarish va eksportga realizatsiya qilishda foydalaniladigan import xomashyo, material va butlovchi qismlarni bojxona to‘lovlarini to‘lamasdan o‘tkazishga ruxsat beriladi. Ular “tovarlarni bojxona hududida qayta ishlash” bojxona rejimiga joylashtirish orqali rasmiylashtiriladi.
Shuningdek, 2028-yilgacha maxsus iqtisodiy va sanoat zonalari direksiyalariga yer solig‘i bo‘yicha imtiyozlar beriladi. Ular tomonidan ijaraga berilgan yer maydonlari uchun hisoblangan summaning 1%i miqdorida to‘lov undiriladi.
Avvalroq Farg‘onaning Tojikiston bilan chegara hududida Termizdagi kabi savdo zonasi tashkil etilishi haqida xabar berilgandi. Viloyatning Qo‘qon erkin iqtisodiy zonasida umumiy qiymati $1 mlrdlik 185ta loyihani joylashtirish rejalashtirilmoqda.
