O‘zbekiston aviakompaniyalari kuchli zilziladan keyin Tailandga parvozlarni davom ettiradi. 28 mart kuni kunduzi Myanmada 7,7 magnitudali zilzila sodir bo‘ldi. Zilzila Tailand poytaxti Bangkokda, Xitoyning Myanma bilan chegaradosh Yunnan va Guansi provinsiyalarida sezilgan.
RBС mahalliy The Nation nashriga tayanib yozishicha, zilziladan keyin Tailand aeroportlari parvozlarni vaqtincha cheklagan.
Biroq, cheklovlar taxminan 20 daqiqa davom etdi, shuning uchun hozirda havo bandargohlari odatdagidek ishlamoqda va barcha reyslar jadvalga muvofiq amalga oshirilmoqda.
Uzbekistan Airways matbuot xizmatining Spot’ga ma’lum qilishicha, aviakompaniyaning Bangkokdan Toshkentga ertalabki reysi sog‘-salomat va hech qanday hodisalarsiz uchib ketgan, ertaga esa Pxuketga parvozni amalga oshirish rejalashtirilgan.
“Yaqin vaqt ichida hech qanday o‘zgarishlar kutilmayapti,” — deya ma’lum qildi Uzbekistan Airways va jadvaldagi o‘zgarishlar haqidagi har qanday ma’lumot tashuvchining Telegram-kanalida e’lon qilinishini qo‘shimcha qildi.
Bundan tashqari, hozircha O‘zaviatsiya agentligi tomonidan Tailandga parvozlarni amalga oshirish bo‘yicha hech qanday ko‘rsatma yuborilmagan.
Qanot Sharq xususiy aviakompaniyasi ham Spot’ga Pxuketga parvozlarni davom ettirishini ma’lum qildi. Boshqa aviatashuvchi — Centrum Air esa 20 maydan boshlab Bangkokka parvozlarni yo‘lga qo‘yadi, ammo parvozlar jadvalida o‘zgarishlar kutilmayapti.
2024-yil iyul oyidan boshlab O‘zbekiston fuqarolari uchun Tailandga 60 kungacha vizasiz rejim joriy etildi. Biroq, agar uzoqroq qolish kerak bo‘lsa, elektron viza tizimi sayyohlik, ishbilarmonlik, oilaviy va boshqa maqsadlarda 90 kungacha bo‘lgan muddatga viza olish imkonini beradi.
2025 yildan boshlab Tailandning xorijdagi barcha diplomatik va konsullik muassasalarida elektron viza xizmati joriy etildi. Tailand vizasini olishni istagan fuqarolar rasmiy Thai E-Visa elektron vizalar platformasida onlayn ariza topshirishlari mumkin.
