2027-yildan san’atkorlardan daromad solig‘i majburiy tartibda undiriladi. Bu haqda 1-aprel kuni AOKAda o‘tkazilgan matbuot anjumanida Soliq qo‘mitasi raisining birinchi o‘rinbosari Mubin Mirzayev ma’lum qildi, deya xabar berdi Spot muxbiri.
Mirzayevning qayd etishicha, amaldagi tartib bo‘yicha san’atkorlar deklaratsiya to‘ldirib, daromadlarini ko‘rsatishi va shu asosda ularning daromadi soliqqa tortilishi kerak. Biroq, san’atkorlar bunga amal qilmayapti — daromadlari to‘liq deklaratsiya qilinmayapti va JShODS undirilmayapti.
“Hozirda xufiyona iqtisodiyotga qarshi kurashish doirasida tegishli qaror loyihasini tayyorlayapmiz. Hujjat jismoniy va yuridik shaxslar olgan daromadlarini to‘liq deklaratsiya qilishni va ularning daromadini soliqqa tortishni belgilaydi. Biz 2025−2026-yillarda ularni jazolamasdan, deklaratsiyani to‘g‘rilab, topshirish imkoniyatini beramiz. Ya’ni, kamchiligi bo‘lsa, ko‘rsatib, tuzatishga yordam beryapmiz”, — dedi u.
Mubin Mirzayev 2027-yilning 1-yanvaridan o‘z daromadlarini to‘liq ko‘rsatmagan yoki soliqlardan qochgan san’atkorlarga nisbatan soliq tekshiruvlari o‘tkazilib, soliqlar hisoblanishi va undirishga berilishini ma’lum qildi. Ikki yil davomida tizim tartibga solinib, qonunchilik asosida daromadlarni soliqqa tortish yuzasidan ishlar olib boriladi.
Shuningdek, Soliq qo‘mitasi raisining birinchi o‘rinbosari 2027-yildan boshlab, “hech bir san’atkor, hech bir jismoniy shaxsning o‘z daromadini deklaratsiya qilmaslik, soliq to‘lashdan qochish imkoni bo‘lmasligini qo‘shimcha qildi. Bu bo‘yicha tegishli dastur ishlab chiqilmoqda.
Avvalroq Temu O‘zbekistonda taxminan 46 mlrd so‘mlik soliq to‘lamagani ma’lum qilingandi. Mubin Mirzayevning qayd etishicha, platformaga e’tiroz xati asosida soliq majburiyati yuklatilgan.
