Belgiya do‘konlarda tamaki mahsulotlarini ko‘zga ko‘rinarli joyga qo‘yishni taqiqladi. Bu haqda Euronews nashri xabar berdi.
Yangi qonun sigareta va tamaki mahsulotlarining impulsiv xaridlarini cheklashga qaratilgan bo‘lib, supermarketlarga ularni sotish butunlay taqiqlanadi.
Unga ko‘ra, do‘konlarda sigareta yoki boshqa tamaki mahsulotlarini ko‘z oldiga qo‘yish taqiqlanadi. 400 kvadrat metrdan katta maydonga ega supermarketlar va do‘konlarga esa endi bu mahsulotlarni sotish umuman man etiladi.
Ushbu chora-tadbirlar tamaki chekishni butunlay yo‘q qilish rejasining bir qismi hisoblanadi. Ular sigareta va boshqa qaram qiluvchi mahsulotlarning ko‘rinishini cheklash orqali impulsiv xaridlarni kamaytirish va tamakiga qarshi kurashishga qaratilgan.
Belgiya sog‘liqni saqlash vaziri Frank Vandenbryuk rahbarligida 1-yanvardan boshlab bir martalik elektron sigaretalarni taqiqlash dasturi amalga oshirila boshlandi.
“Bizning maqsadimiz 2040-yilga kelib avlodni tamakidan xoli qilishdir,” deb tushuntirdi Vandenbryuk, u sigaretalarni butunlay taqiqlash haqida gap ketmayotganini ta’kidladi.
“Bundan buyon sigareta yoki veyplarni vitrinaga, ya’ni do‘konning ko‘rinadigan joyiga qo‘yish taqiqlanadi. Bu ularni sotib olishni taqiqlash degani emas. Xarid qilish uchun sotuvchidan so‘rash kerak bo‘ladi”, — dedi Vandenbryuk.
Do‘konlar moslashishga tayyorlanmoqda
Chakana savdogarlarga bundan buyon tamaki mahsulotlari bilan qanday muomala qilish to‘g‘risida aniq ko‘rsatmalar yoki materiallar berilmagan.
Har bir do‘kon qo‘yishni taqiqlash muammosini hal qilish uchun o‘z yechimini topishga majbur bo‘ldi — qo‘lda yasalgan plastik pardalardan tortib, ochilganda avtomatik ravishda yoritiladigan murakkab javonlargacha.
“Bu g‘ashga tegadi, chunki ular [hukumat] bizga hech narsa taqdim etmadi. Ular zarur jihozlarni ta’minlashlari kerak edi,” — dedi tamaki sotuvchi do‘kon egalaridan biri.
Biroq, boshqalar bu chorani yosh belgiyaliklarning chekishga o‘rganishining oldini olish vositasi sifatida ma’qullamoqda
Avvalroq O‘zbekistonda elektron sigaretalar muomalasini cheklash rejalashtirilayotgani haqida xabar berilgandi.
Deputatlar tegishli qonun loyihasini ko‘rib chiqishni boshladi. Bu tamaki mahsulotlarining mamlakatga noqonuniy olib kirilishi hamda yoshlar orasida iste’moli ortgani bilan bog‘liq.
