Keyingi o‘n yillikda sun’iy intellekt sohasidagi yutuqlar jahon iqtisodiyotining “ko‘plab sohalarida” inson mehnatiga bo‘lgan ehtiyojni sezilarli darajada kamaytiradi. CNBC nashri Microsoft asoschisi Bill Geytsning o‘tgan yilgi intervyusi hamda SI sohasidagi boshqa taniqli mutaxassislarning fikrlariga asoslanib shunday xabar bermoqda.
NBC telekanalining The Tonight Show ko‘rsatuvida Bill Geytsning Jimmi Fellonga bergan intervyusidan ma’lum bo‘lishicha, hozirda “noyob” hisoblanib, “malakali shifokorlar” va “ajoyib o‘qituvchilar” kabi mutaxassislarni jalb etishni talab qiladigan ekspert bilimlari, sun’iy intellektning rivojlanishi tufayli keng ommaga ochiq bo‘lar ekan.
Geytsning fikricha, yaqin o‘n yil ichida dunyo yangi “erkin intellekt” davriga qadam qo‘yadi. Uning ta’kidlashicha, bu sun’iy intellektga asoslangan texnologiyalarning jadal rivojlanishiga olib keladi, ular hayotning deyarli barcha jabhalariga, tibbiy xizmat ko‘rsatish va tashxis qo‘yishni yaxshilashdan tortib, sun’iy intellekt repetitorlari va virtual yordamchilarning keng tarqalishiga qadar kirib boradi.
Harvard universiteti professori va baxt bo‘yicha ekspert Artur Bruksga bergan intervyusida Geyts sodir bo‘layotgan o‘zgarishlarning “chuqur va hatto biroz qo‘rqinchli” xususiyatini ta’kidlab, ularning tezligi va ko‘rinadigan chegaralari yo‘qligini ta’kidladi.
Hozirgi kunda sun’iy intellekt ustunlik qiladigan kelajakda insonning o‘rni haqidagi masala faol muhokama etilmoqda. Ayrim mutaxassislarning fikricha, sun’iy intellekt odamlarning o‘rnini butunlay egallamaydi, aksincha ularning ish unumdorligini oshirishga ko‘maklashadi. Bu esa o‘z navbatida iqtisodiy o‘sishni rag‘batlantiradi va yangi ish o‘rinlari yaratilishiga turtki beradi.
Biroq, Microsoft AI bosh direktori Mustafo Sulaymonning fikricha, yaqin yillardagi texnologik taraqqiyot ko‘plab kasblarda tub o‘zgarishlarga olib keladi va mehnat bozoriga “juda katta beqarorlashtiruvchi” ta’sir ko‘rsatadi.
Sulayman 2023-yilda chop etilgan “Kelayotgan to‘lqin” nomli kitobida sun’iy intellekt dastlab inson aqlini vaqtincha kuchaytirsa-da, pirovardida ishchi kuchini butunlay almashtirishi mumkinligini ta’kidlagan.
Avvalroq Spot sun’iy intellekt inson umrini ikki baravar uzaytirishi mumkinligi haqida yozgandi.
Ta’kidlanishicha, sun’iy intellektning biologiya va sog‘liqqa ehtimoliy ta’siri sababli keyingi 5−10 yil ichida mazkur imkoniyatga erishish ehtimoli bor.
