Toshkent shahrida avtobuslarda chiptasiz harakatlangan yo‘lovchilarga jarima qo‘llanila boshlandi. Bu haqda Toshshahartransxizmat matbuot xizmati ma’lum qildi.
Yil boshidan avtobuslar salonida naqd pul qabul qilish to‘xtatilib, to‘lovlar to‘liq elektronlashtirildi. Yanvar-fevral oylarida avtobuslarda yo‘l haqini amalga oshirmagan yoki chiptasiz harakatlangan yo‘lovchilarga tushuntirish-targ‘ibot ishlari olib borildi.
Shunga qaramay yo‘lovchilar orasida yo‘l haqini qasddan to‘lamaslik holatlari ko‘payayotgani qayd etildi kompaniya xabarida.
Shu sababli joriy yilning 14-mart kunidan boshlab, avtobus yo‘nalishlarida yo‘l haqini to‘lamagan yoki chiptasiz harakatlangan yo‘lovchilarga BHMning 10%i — 37 500 so‘m miqdorida jarima qo‘llanila boshlandi.
Ma’muriy javobgarlik to‘g‘risidagi kodeksning 144-moddasida, yo‘lovchining trolleybusda, tramvayda, shahar ichida va shahar atrofiga qatnaydigan avtobusda chiptasiz yurishi — BHMning o‘ndan bir qismi miqdorida jarima solishga sabab bo‘lishi belgilangan.
Toshshahartransxizmat yo‘lovchilardan avtobuslarda yo‘l haqi to‘lovini o‘z vaqtida amalga oshirishni so‘ramoqda.
2025-yilning 1-yanvaridan boshlab Toshkent shahrida avtobuslarda naqd pul qabul qilish amaliyoti to‘xtatildi. To‘lovlar faqat elektron qabul qilinadi hamda uni naqd pulda amalga oshirish uchun QR-chiptalarni tegishli to‘lov qurilmalari orqali xarid qilish mumkin. Agar infokiosklarda QR-chipta chiqmay qolsa, uni rasmga olib, avtobusda skanerlash mumkin.
Undan keyin, Transport nazorati inspeksiyasi yo‘l haqini naqd pulda to‘lagan yo‘lovchilar jarimaga tortilishini ma’lum qildi. Biroq, Transport vazirligi bu xabarni rad etib, jarima faqat chiptasiz yurish holatida qo‘llanilishini bildirdi.
Bundan tashqari, transport vaziri Ilhom Mahkamov bekatlarda QR-kodli bir martalik chiptalarni sotib olish uchun 675 ta infokiosk o‘rnatilishini ma’lum qildi. Shu bilan birga, 1-fevralgacha Toshkent jamoat transportini rivojlantirish bo‘yicha qonun loyihasi ishlab chiqilishi rejalashtirilgan edi.
Toshshahartransxizmat boshqaruv raisining birinchi o‘rinbosari Rustam Shamuradov infokiosklar budjet mablag‘lariga emas, balki tadbirkorlar tomonidan o‘rnatilishini qayd etdi. Yo‘lovchilar taklif va e’tirozlari asosida bekatlardan 300 metr uzoqlikda joylashgan infokiosklar ro‘yxati shakllantirilib, 675ta bekatdan 210tasiga infokiosklar o‘rnatilgan.
