Soliq qo‘mitasi biznesni legallashtirish sharti bilan iste’molchilarga to‘lanadigan soliq keshbekini ikki baravar oshirishga tayyor. Bu haqda 1-aprel kuni AOKAda o‘tkazilgan matbuot anjumanida Soliq qo‘mitasi raisining birinchi o‘rinbosari Mubin Mirzayev ma’lum qildi, deya xabar berdi Spot muxbiri.
Uning qayd etishicha, Soliq qo‘mitasining maqsadi naqd pulsiz to‘lov shaklini maksimal darajada rag‘batlantirishga qaratilgan. Xususan, budjetga tushadigan soliqlarning uchdan bir qismi idoraning elektron to‘lov tizimlari orqali to‘lanadi.
“Biz bu ulushni 60−70% ga yetkazmoqchimiz. Agar buni uddalay olsak, bizda soliq to‘lovchilardan qo‘shimcha ma’lumot so‘rashga ehtiyoj kamayadi va ular ham o‘z navbatida bizga nisbatan e’tiroz ham kamayadi”, — dedi u.
Shuningdek, Mirzayev har qanday to‘lovlar Soliq qo‘mitasining elektron xizmatlari orqali amalga oshirilsa, soliq to‘lashdan bo‘yin tovlash ehtimoli kamayishini qo‘shimcha qildi.
Bundan tashqari, qo‘mita 2024-yilning 1-oktabridan boshlab umumiy ovqatlanish korxonalariga (naqd pulsiz hisob-kitoblarning aylanmadagi ulushiga qarab 20% dan 40% gacha), shuningdek, mehmonxonalar va turoperatorlarga QQSning bir qismini qaytarish bo‘yicha joriy etilgan tartib natijalarini tahlil qilmoqda.
“Maqsad — umumiy ovqatlanish sohasini legallashtirib, qonuniy to‘g‘ri ishlashini ta’minlash. Agar bu o‘z samarasini bersa, boshqa sohalar uchun keshbek miqdorini hozirgi 1% dan 2% ga oshirishga tayyormiz”, — dedi Mubin Mirzayev jurnalist savoliga javoban.
Uning ta’kidlashicha, hozirda Soliq qo‘mitasi Iqtisodiyot va moliya vazirligi bilan birgalikda biznesni legallashtirish uchun keshbek miqdorini oshirish bo‘yicha hisob-kitob olib borilmoqda. Agar legallashtirish imkoni bo‘lsa, qo‘mita soliq keshbekini oshirish masalasini o‘rganib chiqishga va hukumatga taklif kiritishga tayyor.
Prezidentning yashirin iqtisodiyotga qarshi kurashishga qaratilgan o‘tgan yilgi qarori loyihasi bilan savdo, xizmat ko‘rsatish va umumiy ovqatlanish sohalarida mobil ilovalar va plastik kartalar orqali to‘lovlarda 1% keshbekni saqlab qolgan holda naqd puldagi to‘lovlar uchun soliq keshbekini bekor qilish taklif qilingandi.
“Gazeta.uz” manbasiga tayanib, hujjat ishlab chiquvchilari to‘lovlarni 2% gacha oshirish variantini ham muhokama qilayotgani haqida yozgandi.
O‘tgan yil boshida prezident qarori bilan aholiga qaytariladigan 1% keshbek summasiga chegaraviy miqdor o‘rnatildi. Endi oyiga BHMning 60 baravari (22,5 mln so‘m) miqdoridagi cheklarni skanerlash mumkin.
Soliq qo‘mitasi cheklovlar iste’molchilarning 98%iga ta’sir qilmasligini ta’kidladi. Qolgan 2% fuqarolar boshqalarning cheklarini o‘zlashtirib, ularni o‘z qarindoshlari orqali ro‘yxatdan o‘tkazgan.
2024-yilda Soliq qo‘mitasi iste’molchilarga 1 trln so‘m keshbek to‘lagan. To‘lovlarning yarmi poytaxt va Toshkent viloyati hissasiga to‘g‘ri keldi. Fiskal cheklar soni esa 1 mlrd donadan oshdi.
