Biznes-ombudsman elektromobillar importidagi cheklovlar bo‘yicha O‘zstandart agentligiga so‘rov yubordi. Bu haqda ombudsman matbuot xizmati xabar berdi.
2-aprel kuni Tadbirkorlik subyektlarining huquqlari va qonuniy manfaatlarini himoya qilish bo‘yicha vakil devonida O‘zbekiston texnik jihatdan tartibga solish (O‘zstandart) agentligi vakillari bilan uchrashuv o‘tkazildi.
Unda tomonlar elektromobillar importi bilan shug‘ullanuvchi tadbirkorlarning murojaatlarini ko‘rib chiqib, ushbu masalani ijobiy hal etish yo‘llarini muhokama qildi.
Qayd etilishicha, muammoning huquqiy jihatlariga to‘liq oydinlik kiritish maqsadida agentlikka so‘rov xati yuborilgan.
Shu kuni Facebook’da O‘zbekistonda elektromobil sotuvchi avtosalonlar rahbarlarining prezidentga murojaati e’lon qilindi. Xabarga bundan bir yil oldin tarmoqda e’lon qilingan postga havola keltirilgan. Tadbirkorlar murojaatida mamlakatda avtomobil importiga qo‘yilgan cheklovlarni olib tashlashni so‘ragan.
Undan keyin, bu bo‘yicha rasmiy munosabat bildirgan Biznes-ombudsman mazkur holatlar qonun hujjatlari talablariga muvofiqligi yuzasidan devon tomonidan o‘rganilayotganini ma’lum qildi.
O‘zbekistonda elektromobillar importidagi cheklovlar
2024-yilning 18-mart kuni elektromobillar va gibrid avtomobillar hamda ularning butlovchi qismlarini ishlab chiqarishni tashkil etish bo‘yicha investitsiya bitimini tasdiqlash to‘g‘risida prezident qarori qabul qilindi.
Hujjat bilan Xitoyning BYD elektromobillari importini tartibga solish topshirildi. Investor hukumatga mahalliy iqlim va yo‘l sharoitlariga moslashmagan, rasmiy kafolatga ega bo‘lmagan elektromobillarning tartibsiz importini cheklash bo‘yicha murojaat qilgan.
Iqtisodiyot va moliya vazirligi, ISSV hamda O‘zavtosanoat'ga 1-iyulgacha BYD brendi ostidagi avtomobillar importini tartibga solish bo‘yicha investor talabini amalga oshirishga qaratilgan takliflar kiritish topshirilgandi.
Undan keyin Raqobat qo‘mitasi “cheklov kiritilishi bo‘yicha aniq fikr aytishga hali erta” ekanligini, holatni o‘rganilib, takliflar berilishini hamda muvozanatli qaror qabul qilinishini bildirgandi.
Iyul oyida avtomobilsozlik va elektrotexnika sohasi tadbirkorlari bilan o‘tkazilgan ochiq muloqotda ADM Jizzakh zavodi bosh direktori Doniyor Davletiyarov elektromobillar importi uchun bojlarni qaytarishni taklif qildi.
Savdo-sanoat palatasi raisi Davron Vahobov ushbu taklifni to‘liq qo‘llab-quvvatlashini bildirdi. Uning ta’kidlashicha, bu masala “monopoliya bilan bog‘lik emas, unga kengroq qarash kerak. Biroq, iqtisodchilar import o‘rnini bosish siyosatidan voz kechishga va faqat O‘zbekiston qiyosiy ustunlikka ega bo‘lgan mahsulotlarni ishlab chiqarishga chaqirdi.
Avvalroq O‘zbekistonda Leapmotor yengil avtomobillarini sertifikatlash vaqtincha to‘xtatilgani haqida xabar berilgandi. Bunga Leapmotor C16 avtomobilining xavfsizlik talablariga javob bermasligi sabab bo‘lgan.
