Yangidan tashkil etilgan Issiqlik ta’minoti kompaniyasiga rahbar tayinlandi. Bu haqda Qurilish va uy-joy kommunal xo‘jaligi vazirligi matbuot xizmati xabar berdi.
Hukumat qarori bilan Ilhom Habibullayevich Turayev vazirlik huzuridagi ushbu kompaniya boshqaruvi raisi etib tayinlandi.
Bungacha, Ilhom Turayev Qurilish vazirligi Issiqlik ta’minoti tizimini rivojlantirish va ekspluatatsiya faoliyatini muvofiqlashtirish boshqarmasi boshlig‘i lavozimida faoliyat yuritib kelgan.
Joriy yilning 11-mart kuni qabul qilingan prezident qarori bilan Issiqlik ta’minoti aksiyadorlik jamiyati tashkil etilishi belgilangandi. Qurilish vazirligiga issiqlik ta’minoti sohasida yagona davlat siyosatini yuritish yuklatildi.
Hujjat bilan kompaniya ustav kapitalini 23 ta xo‘jalik jamiyatlari va korxonalar ustav kapitali hisobiga shakllantirish, ularni mas’uliyati cheklangan jamiyatlar sifatida qayta tashkil etish belgilangan. Iqtisodiyot va moliya vazirligiga korxonaning ustav kapitalidagi davlat aksiya paketlari bo‘yicha aksiyador huquqini amalga oshirish yuklatildi.
Qurilish vazirligiga ko‘p qavatli uylar hamda ijtimoiy muassasalarda energiya samaradorligini oshirish topshirildi. 9 mingta uy-joy va binolar yopiq isitish tizimiga o‘tkaziladi. Natijada issiqlik yo‘qotilishi 2 barobar, gaz iste’moli 20% ga kamayadi.
Avvalroq issiqlik va elektr yetkazib beruvchilar qarzdorlikni undirishdagi da’vo uchun davlat bojidan ozod etilgani haqida xabar berilgandi. Ularning talablari to‘liq yoki qisman rad etilsa, ushbu boj korxonalardan undiriladi.
