Meta 2025-yil oxirigacha kengaytirilgan reallik ko‘zoynagini taqdim etishni rejalashtirmoqda. Bu haqda Bloomberg sharhlovchisi Mark Gurman xabar berdi.
Qayd etilishicha, qurilmaga Hypernova degan kod nomi berilgan. Ko‘zoynaklarning narxi taxminan $1300−1400 atrofida bo‘lishi mumkin.
Qurilmaning eng qimmat qismi ekran hisoblanadi, u o‘ng linzaning pastki burchagidagi monokulyar paneldan iborat. Gurman tushuntirishicha, bu panel ma’lumotni faqat foydalanuvchining o‘ng ko‘zi oldida aks ettiradi.
Ko‘zoynak modifikatsiyalangan Android versiyasida ishlaydi. Bosh ekranda ilovalarning dumaloq piktogrammalari joylashtiriladi. Ular orasida kamera, fotosuratlar galereyasi va xaritalar mavjud.
Shuningdek, qurilmani bildirishnomalar olish, musiqa tinglash, qo‘ng‘iroqlar qilish va ovozli sun’iy intellektni boshqarish uchun telefonga ulash mumkin bo‘ladi.
Hypernova’ni yoylardagi sensorli panellar yordamida boshqarish imkoniyati bo‘ladi — masalan, ilovalar ekranlarini yoki fotosuratlarni varaqlash.
Kompaniya, shuningdek, ko‘zoynaklar bilan birga ularni imo-ishoralar yordamida boshqarish imkonini beruvchi Ceres “neyron bilaguzugi"ni ham yetkazib berishni rejalashtirmoqda.
Bundan tashqari, suhbatdoshlar aytishicha, Meta allaqachon ko‘zoynaklarning ikkinchi versiyasi ustida ish boshlagan. Unda ikkita ekran bo‘ladi — har bir linzaga bittadan. Hypernova 2 ning taqdimoti 2027-yilga mo‘ljallangan.
Avvalroq Spot Samsung va Google birgalikda kengaytirilgan reallik ko‘zoynagini ishlab chiqayotgani haqida yozgandi.
Biroq kompaniyalar hozircha qurilmaning texnik tafsilotlari va taxminiy chiqish sanasi haqida ma’lumot bermagan.
