Avvalroq ikki yil oldin xususiylashtirilgan Kvars zavodi yana davlat tasarrufiga o‘tgani haqida xabar berilgandi. 2023-yilning fevralida shisha zavodini sotib olgan Quvasoysement korxonasi Davaktiv agentligini o‘z ichiga olgan affillangan shaxslar ro‘yxatidan chiqarilgan.
Davlat aktivlarini boshqarish agentligi zavod aktivlari qaytarilishi yuzasidan rasmiy munosabat bildirdi. Agentlikning qayd etishicha, zavod sotib olish to‘lovlarini uch yilda bo‘lib-bo‘lib to‘lash sharti bilan sotilgan.
Shundan kelib chiqib, Kvars’ning faoliyati monitoring qilib borilgan va to‘lov grafiklaridagi uzilishlarning oldini olish maqsadida xaridor — Quvasoysement ogohlantirib kelingan.
Zavod ustav kapitalidagi 89,78% aksiyalar paketini sotib olishdagi shartnomaviy majburiyatlarini bajarishdagi qiyinchiliklar tufayli, Quvasoysement’ni boshqaruv organlarining qarori bilan oldi-sotdi shartnomasini bekor qilish bo‘yicha agentlikka murojaati kelib tushgan.
Shunga ko‘ra, oldi-sotdi shartnomasi tomonlarning joriy yilning 14-fevralidagi o‘zaro kelishuviga asosan bekor qilinib, zavodning kuzatuv kengashi tarkibi qayta ko‘rib chiqilgan va unga Davaktiv agentligi vakillari kiritilgan.
“89,78% aksiyalar paketini davlat ixtiyoriga qaytarish shartnoma shartlari to‘liq bajarilmaganligi natijasida yuz bergan va shartnomaviy-huquqiy munosabatlar doirasida amalga oshirilgan bo‘lib, bu holat xususiylashtirish natijalarini qayta ko‘rib chiqish yoxud milliylashtirish hisoblanmaydi”, deyiladi xabarda.
Shuningdek, agentlik bugungi kunda Kvars’ni moliyaviy sog‘lomlashtirish bo‘yicha “yo‘l xaritasi” tasdiqlanib, tegishli chora-tadbirlar amalga oshirilayotganini qo‘shimcha qilgan.
Kap Depo investitsiya kompaniyasining yozishicha, Kvars 2024-yilni 2023-yildagi 21,7 mlrd so‘mga nisbatan 141,6 mlrd so‘mlik rekord darajadagi zarar bilan yakunlagan. Shuningdek, Quvasoysement 2024-yilning uchinchi choragida 37,4 mlrd so‘m zarar ko‘rgan.
2021-yilning fevralida Kvarts’ning davlat ulushini auksionga qo‘yish bo‘yicha davlat rahbarining farmoni qabul qilindi. Oradan bir yarim yil o‘ttib, 2022-yilning iyunida zavodni xususiylashtirish jarayoni boshlandi. 2023-yil fevralda kompaniya ustav kapitalidagi 89,78% ulushini Quvasoysement 265 mlrd so‘mga sotib oldi.
