2-mart kuni avtomobil transportida yo‘lovchi tashish faoliyatini tartibga solishga qaratilgan hukumat qarori qabul qilindi.
Hujjat bilan joriy yilning 15-aprelidan o‘zini o‘zi band qilgan shaxslarga Toshkent shahrida haydovchidan tashqari 4 tadan ortiq va 8 tadan ko‘p bo‘lmagan o‘rindiqlar hamda qulayliklarga ega avtotransport vositalarida yo‘nalishsiz taksi faoliyatini amalga oshirishga ruxsat etiladi.
Bunda ushbu avtomobillar turlari Transport vazirligi tomonidan tasdiqlanadi. Ushbu tartib eksperiment tarzida yo‘lga qo‘yilib, 2026-yilning yakunigacha amal qiladi. Litsenziya varaqasi uchun tashuvchilardan BHMning 3 barobari (1,125 mln so‘m) miqdorida davlat boji undiriladi.
Shuningdek, qaror bilan yuridik shaxslarga (agregatorlar) tegishli yo‘nalishsiz taksilarga yo‘lovchilarni olish va tushirish maqsadida “To‘xtash taqiqlangan” yo‘l belgisi amal qilish hududida, shu jumladan, aeroport va vokzallarga tutash hududlarda to‘xtash huquqi beriladi.
Ular aeroportlar, temir yo‘l vokzallari, avtovokzallar, ustav fondida davlat ulushi 50% va undan ortiq bo‘lgan qurilish mollari, dehqon va buyum bozorlari hamda savdo majmualarining pulli to‘xtash joylariga yo‘lovchilarni olish va tushirish uchun bepul kirishlari mumkin.
Bundan tashqari, yo‘nalishsiz taksilarga yo‘nalishli transport vositalari uchun ajratilgan maxsus harakatlanish yo‘lagi bo‘ylab harakatlanishga ruxsat beriladi.
Joriy yilning fevral oyida qabul qilingan prezident qarori bilan yengil avtomobillarda yo‘lovchilarni shahar, shahar atrofi va shaharlararo tashish o‘zini o‘zi band qilgan fuqarolar shug‘ullanishi mumkin bo‘lgan faoliyat turlari ro‘yxatiga kiritildi. Ular daromadlari yangi yil boshidan “nol"dan hisob-kitob qilinadi.
Mart oyida Oliy Majlis Senati avtobus yo‘laklarida harakatlanganlik uchun javobgarlik belgilashga qaratilgan qonunni ma’qullagandi. Birinchi marta sodir etilgan qoidabuzarlik uchun 375 ming so‘m miqdorida jarima belgilanadi. Agar bu takror kuzatilsa, jarima 1,125 mln so‘mni tashkil etadi.
Avvalroq Toshkentda avtobuslarda chiptasiz yurganlarga jarima qo‘llanila boshlangani haqida xabar berilgandi. Bu tartibni buzgan yo‘lovchilarga 37,5 ming so‘m miqdorida jarima belgilanadi.
