Raqobatni rivojlantirish va iste’molchilar huquqlarini himoya qilish qo‘mitasi Uzum Tezkor’ning ustun mavqeini tan oldi. Bu haqda qo‘mita matbuot xizmati xabar bermoqda.
Qo‘mitaning tegishli buyrug‘i bilan tayyor ovqat va boshqa iste’mol mahsulotlarini buyurtma berish va yetkazib berish agregatori xizmati bozorida Uzum Tezkor ustun mavqega ega raqamli platforma operatori deb e’tirof etildi.
Bunga asos sifatida Uzum Tezkor bozorda ustun mavqega erishganligi to‘g‘risida Raqobat qo‘mitasiga xabarnoma taqdim etgan.
Shuningdek, qo‘mita tomonidan ustun mavqega ega raqamli platforma operatori faoliyatini raqobat to‘g‘risidagi qonun hujjatlariga muvofiq, ustun mavqeini suiiste’mol qilish holatlarini oldini olish maqsadida majburiy tartibda Monopoliyaga qarshi komplayens tizimi joriy etiladi va tegishli tartibda monitoring o‘tkazib borilishi ma’lum qilinadi.
Avvalroq Raqobat qo‘mitasi Uzum Marketni ham ustun mavqega ega deb topgandi. Qo‘mita buyrug‘i bilan marketpleyslar bozorida Uzum Market ustun mavqega ega raqamli platforma operatori deb e’tirof etildi.
2024-yil oktabr oyida Raqobat qo‘mitasi “Yandex Eats” va “Express24” raqamli platforma operatorlarining ustun (monopol) mavqeini tan olgandi.
Qo‘mitaqaroriga ko‘ra, “YandexGo UB” taksi agregator bozorida, “Yandex Eats va Express24” esa tayyor oziq-ovqat yetkazib berish bozorida ustun mavqega ega kompaniya sifatida tan olingan.
Raqobat qo‘mitasi ustun mavqega ega bo‘lgan xo‘jalik yurituvchi subyektlar ro‘yxatiga kiritilish sabablari sifatida “YandexGo UB” va “Yandex Eats” kompaniyalarining bozor ulushining 40%dan oshib ketgani haqidagi bildirishnomalarini keltirdi.
Boshqarmaning ta’kidlashicha, ustun mavqega ega bo‘lgan raqamli platformalarni suiiste’mol qilishning oldini olish maqsadida monopoliyaga qarshi muvofiqlik tizimi mutlaq joriy etilishi va nazorat o‘rnatilgan tartibda amalga oshiriladi.
Bundan tashqari qo‘mita “Payme” raqamli platforma operatorining ustun mavqeini tan olgan edi.
Shu bilan birga, o‘tgan yilning dekabrida Uzbekistan Airways va Silk Avia ustun mavqega ega deb topilgandi.
