Amazon Xitoyning ByteDance kompaniyasidan TikTok’ning Amerika bo‘linmasini sotib olish uchun ariza topshirdi, deb yozadi The New York Times.
Nashr manbalarining so‘zlariga ko‘ra, muzokaralarda ishtirok etgan tomonlar, aftidan, Amazon taklifini jiddiy qabul qilmayapti. Suhbatdoshlardan birining aniqlik kiritishicha, kompaniya taklifi keltirilgan maktub AQSh vitse-prezidenti Jey Di Vens va savdo vaziri Govard Lyutnikka yo‘llangan.
Holat yuzasidan nashr tomonidan yuborilgan so‘rovga Amazon izoh berishdan bosh tortdi. TikTok esa javob bermadi.
2024-yil aprel oyida Jo Bayden davrida qabul qilingan qonunga ko‘ra, 19-yanvardan boshlab amerikalik foydalanuvchilar uchun TikTok’ni bloklash boshlandi. U AQSh yoki unga yaqin yurisdiksiyadagi xaridorga sotilgunga qadar davom etishi kerak edi.
19-yanvar kuni Tramp o‘zining Truth Social ijtimoiy tarmog‘ida TikTok’ning bloklanishiga yo‘l qo‘ymasligini va’da qildi. Uning aytishicha, bu qadam platformani amerikalik sherik 50% ulushga ega bo‘ladigan qo‘shma korxonaga o‘tkazish to‘g‘risidagi kelishuvga erishish imkonini beradi.
“Biz TikTok’ni qutqaramiz, uni ishonchli qo‘llarda saqlaymiz va faoliyatini davom ettirishiga imkon yaratamiz. AQShning roziligisiz TikTok mavjud bo‘lmaydi. Bizning roziligimiz bilan esa u yuzlab milliard, balki trillion dollarlarga teng qiymatga ega bo‘lishi mumkin,” — deb ta’kidladi tadbirkor.
19-yanvarga o‘tar kechasi TikTok AQShda o‘z faoliyatini to‘xtatdi va amerikalik foydalanuvchilar uchun ilovaga kirishni, jumladan VPN orqali ham foydalanishni o‘chirdi. Biroq bir necha soatdan so‘ng platforma yana ishlay boshladi va kirish paytida “Prezident Trampning sa’y-harakatlari tufayli TikTok AQShda yana faoliyat yuritmoqda!” degan xabar ko‘rsatildi.
20-yanvar kuni AQShning 47-prezidenti bo‘lgan Donald Tramp TikTok ijtimoiy tarmog‘ini bloklashni kechiktirish to‘g‘risida farmon chiqardi.
Farmonda Adliya vazirligiga “Do‘stlashmagan chet elliklar tomonidan nazorat qilinadigan ilovalar to‘g‘risida"gi Qonunning ijrosini 75 kunga kechiktirish vazifasi yuklatilgan. Bu muddat 2025-yil 5-aprelda tugaydi.
Qayd etilishicha, qaror “millionlab amerikaliklar foydalanadigan platformani keskin o‘chirishning oldini olish” zarurligi bilan izohlanadi.
“Muvaffaqiyatsiz [bloklash talabining kuchga kirishi] taqiqning milliy xavfsizlik va tashqi siyosatga ta’sirini baholash imkoniyatiga to‘sqinlik qilmoqda. Shuningdek, u “TikTok"ning to‘satdan o‘chib qolishining oldini olish uchun qaror qabul qilishga yo‘l qo‘ymaydi,” — deyiladi farmonda.
Oq uy TikTok bo‘yicha keyingi harakatlar rejasini belgilashni mo‘ljallamoqda. AQSh Adliya vazirligi internet-provayderlar va telekommunikatsiya operatorlariga farmonning amal qilish muddati davomida platformaga kirishga ruxsat berganligi uchun hech qanday cheklovlar qo‘llanilmasligini ma’lum qilishi kerak.
