Belgiya korrupsiya ishi bo‘yicha musodara qilingan $108 mlnni O‘zbekistonga o‘tkazadi. Bu haqda Bryussel prokuraturasi ma’lum qildi.
Bryussel prokuraturasi O‘zbekiston sud organlaridan telekommunikatsiya shartnomalari bilan bog‘liq yashirin komissiya to‘lovlari aniqlangandan so‘ng xalqaro yordam so‘rovini qabul qildi.
Prokuratura huzuridagi Musodara va olib qo‘yish markaziy agentligi (COIV) hisob raqamlarini xatladi.
“Ushbu xalqaro tergovga javoban O‘zbekiston hukumatining so‘roviga binoan Belgiyada $200 mln miqdoridagi mablag‘ xatlab qo‘yildi”, deya ma’lum qildi Bryussel prokurori.
Bryussel sudi xatlab qo‘yilgan mablag‘lar va ular bo‘yicha to‘plangan foizlar Yevropa Ittifoqiga a’zo davlatlar o‘rtasida musodara qilingan aktivlarni taqsimlash to‘g‘risidagi huquqiy qoidalarga muvofiq Belgiya va O‘zbekiston o‘rtasida taqsimlanishi lozimligini qaror qildi.
Fevral oyida O‘zbekiston va Shveysariya Gulnora Karimova ishi bo‘yicha muzlatilgan $182 mlnni qaytarish to‘g‘risida kelishuvni rasmiylashtirishgandi. Mablag‘lar BMTning Uzbekistan Vision 2030 Fondi ko‘p sheriklik trast jamg‘armasi orqali qaytarilishi rejalashtirilgan.
Mazkur mablag‘lar 2012-yilda Shveysariya Bosh prokuraturasi tomonidan Karimovaga nisbatan qo‘zg‘atilgan jinoyat ish yurituvi doirasida to‘laqonli musodara qilingan edi.
2022-yilda Gulnora Karimovaning $131 mlnlik aktivlarini Shveysariyadan qaytarish bo‘yicha yakuniy bitim imzolangan edi. Unga ko‘ra, aktivlarni qaytarish bir nechta prinsiplar asosida amalga oshiriladi.
2023-yilda Shveysariya Bosh prokuraturasi Gulnora Karimovaning jinoiy ishini mamlakat federal sudiga o‘tkazgandi.
Avvalroq Spot O‘zbekistonda korrupsiyaga qarshi kurashish agentligi faoliyati o‘zgartirilishi haqida yozgandi.
Prezident bosh vazir Abdulla Aripovga 117 ta vazirlik va idoradagi “korrupsiyaga qarshi ichki nazorat” tuzilmalari rahbarlarini ishdan olish bo‘yicha topshiriq berdi.
