Shavkat Mirziyoyev 3-aprel kuni Samarqand sammiti doirasida mamlakatga tashrif buyurgan Yevropa kengashi prezidenti Antoniu Koshta va Yevropa komissiyasi prezidenti Ursula fon der Lyayen bilan uchrashuv o‘tkazdi. Bu haqda prezident matbuot xizmati xabar berdi.
O‘zbekiston bilan Yevropa Ittifoqi o‘rtasidagi savdo-iqtisodiyot va investitsiya sohalaridagi hamkorlikni rivojlantirish masalalari ko‘rib chiqildi. Mamlakatning YI davlatlari bilan tovar ayirboshlash hajmi barqaror ortib bormoqda. Yevropa kompaniyalari ishtirokidagi investitsiya loyihalari portfeli 30 mlrd yevrodan ziyodni tashkil etadi.
Muzokaralarda innovatsiyalar, “yashil” energetika, tog‘-kon tarmog‘i, qishloq xo‘jaligi, transport, logistika, raqamlashtirish va boshqa yo‘nalishlarda qo‘shma dastur va kooperatsiya loyihalari ilgari surildi.
Turizm, madaniyat, fan, ta’lim va sog‘liqni saqlash sohalaridagi faol almashinuvlarni davom ettirish muhimligi qayd etildi. Markaziy Osiyo va Yevropa Ittifoqining “Global darvoza” strategiyasi doirasida o‘zaro bog‘liqligini kuchaytirish istiqbollari muhokama qilindi.
Shavkat Mirziyoyev, Antoniu Koshta va Ursula fon der Lyayen huzurida O‘zbekistonda Yevropa investitsiya bankining mintaqaviy ofisini ta’sis etish to‘g‘risida bitim imzolandi.
Ofisning Toshkentda ochilishi o‘zaro manfaatli hamkorlikni kengaytirishi, O‘zbekistonda, umuman, Markaziy Osiyoda “yashil” iqtisodiyot, innovatsion sanoat va zamonaviy infratuzilmani rivojlantirishga jalb etilayotgan investitsiyalar hajmini oshirish imkonini berishi qayd etildi.
2023-yilning oktabrida poytaxtda Yevropa investitsiya banki vakolatxonasi ochilishi ma’lum bo‘lgandi. 2024-yil boshida O‘zbekiston va YIB o‘rtasida 500 mln yevrolik anglashuv memorandumi imzolandi.
