Eksklyuziv huquqlar berilgan xo‘jalik yurituvchi subyektlar reyestri e’lon qilindi. Bu haqda Raqobat qo‘mitasi matbuot xizmati xabar berdi.
Ro‘yxat joriy yilning 28-fevralida qabul qilingan prezidentning iqtisodiyotda raqobatni rivojlantirish va xususiy sektorning rolini oshirish to‘g‘risidagi farmoniga muvofiq shakllantirildi.
Xususan, 67 ta tadbirkorlik subyektlari va davlat tashkilotlariga jami 81 ta faoliyat turlari bo‘yicha eksklyuziv huquq biriktirilgan. Ular birinchi navbatda energetika sohasiga, foydali qazilmalarni qazib olishga hamda davlat bilan bog‘liq funksiyalarga taalluqlidir.
Masalan, 26 ta kompaniya aholi soni 20 ming kishidan kam bo‘lgan shahar posyolkalarining bosh rejalarini ishlab chiqish bo‘yicha mutlaq huquqqa ega. Elektron onlayn-auksionlarni tashkil etish markaziga (E-auksion) esa 16 ta eksklyuziv huquq berilgan.
Ro‘yxatdagi kam sonli xususiy kompaniyalardan biri CRPT Turon hisoblanadi. Korxona Asl Belgisi mahsulotlarni markirovkalash tizimining eksklyuziv operatori bo‘lib, majburiy markirovkalanadigan mahsulotlarni ishlab chiqaruvchilar va import qiluvchilarga kodlarni taqdim etadi.
Raqobat qo‘mitasi o‘tgan davr mobaynida, davlat rahbarining tegishli qarorlari bilan 24 ta tadbirkorlik subyektlari va davlat tashkilotlariga berilgan eksklyuziv huquqlar bekor qilinganini qo‘shimcha qildi.
Ekskluziv huquq berilgan xo‘jalik yurituvchilar ro‘yxati va ularning faoliyat turlari bilan batafsil havola orqali tanishish mumkin.
O‘tgan yilning iyun oyida qabul qilingan prezident farmoni bilan O‘zmetkombinat, O‘zikkilamchiranglimetall, O‘ztreyd hamda O‘zkimyoimpeks'ning maxsus huquqlari bekor qilinishi belgilandi. Shu bilan birga, 2026-yilning 1-iyulidan UzGasTrade hamda O‘zenergosotish'ning ham eksklyuziv huquqlari bekor qilinadi.
Joriy yilning 1-aprelidan yana bir qator kompaniyalarning eksklyuziv huquqlari bekor qilindi. Bular qatorida O‘zbekekspertiza, O‘zInjiniring, Milliy PR-markazi, Sag agro MTP hamda O‘zbekiston standartlar instituti bor.
Avvalroq Raqobat qo‘mitasi Uzum Tezkorni ustun mavqega ega deb topgani haqida xabar berilgandi.
