Avvalroq avtomobil transportida yo‘lovchi tashish faoliyatini tartibga solishga qaratilgan hukumat qarori qabul qilingani haqida xabar berilgandi. Toshkentda o‘zini o‘zi band qilgan shaxslarga minivenlarda taksichilik qilishga ruxsat beriladi.
Hujjat bilan o‘zini o‘zi band qilgan shaxslar uchun soliqlarni soliq agentlari (taksi agregatori) hisoblashi belgilanmoqda. Bu haqda Soliq qo‘mitasi matbuot xizmati xabar berdi.
Ularning soliq davrida ishlarni bajarishdan (xizmatlar ko‘rsatishdan) olgan daromadlari 100 mln so‘mdan oshganda, ular to‘lashi lozim bo‘lgan soliqlar yuridik shaxslar (soliq agenti) tomonidan to‘lov manbaida ushlab qolinadi.
Buning uchun soliq organlari tomonidan yuridik shaxslarga xabarnoma yuboriladi. To‘lovlar soliq agentlari to‘lov manbaida avtomatik hisoblanib, budjetga yo‘naltiriladi.
Mart oyi boshida qo‘mita taksi faoliyati bilan band bo‘lganlar uchun soliqni hisoblash yuzasidan tegishli takliflar ishlab chiqilganini, bu tartib asosida soliqqa tortish tizimi joriy etilishini ma’lum qilgandi.
Joriy yilning fevral oyida qabul qilingan prezident qarori bilan yengil avtomobillarda yo‘lovchilarni shahar, shahar atrofi va shaharlararo tashish o‘zini o‘zi band qilgan fuqarolar shug‘ullanishi mumkin bo‘lgan faoliyat turlari ro‘yxatiga kiritildi. Ularning 100 mln so‘mgacha daromadlariga soliq hisoblanmaydi hamda yangi yil boshidan “nol"dan hisob-kitob qilinadi.
Avvalroq O‘zbekistonda boy aholini soliqqa tortishning alohida tizimini yaratish rejalashtirilayotgani haqida xabar berilgandi. Soliq qo‘mitasi eng yuqori hamda xorijda olingan daromadga ega bo‘lgan jismoniy shaxslarning to‘liq bazasini shakllantiradi.
