Toshkent shahrida yuk avtomobillari harakati vaqtincha cheklanadi. Bu haqda Toshkent shahar IIBB Yo‘l harakati xavfsizligi boshqarmasi matbuot xizmati xabar berdi.
4-apreldan 9-aprelgacha poytaxtda Parlamentlararo ittifoqining 150-yubiley assambleyasi tadbirlari o‘tkazilishi rejalashtirilgan. Shu vaqt ichida Toshkentning markaziy ko‘chalarida yuk transport vositalarining harakatini to‘liq cheklash ko‘zda tutilgan.
Qurilish obyektlarida og‘ir va yengil vaznli barcha toifadagi yuk tashuvchi transport haydovchilari faqat Toshkent halqa avtomobil yo‘lidan harakatlanishlari mumkinligi ma’lum qilindi.
Poytaxt IIBB vaqtinchalik noqulayliklar uchun uzr so‘rab, haydovchilarga o‘z yo‘llarini oldindan rejalashtirishlarini tavsiya qildi.
Avvalroq Toshkentda minivenlarda taksichilik qilishga ruxsat berilishi haqida xabar berilgandi. Bundan tashqari, agregatorlarga yo‘nalishsiz taksilarga ayrim hududlarda to‘xtash, bepul kirish hamda avtobus yo‘lagida harakatlanish huquqi beriladi.
Endi o‘zini o‘zi band qilgan taksichilar uchun soliqlar yangi tartibda undiriladi. Xizmat ko‘rsatishda daromadlari 100 mln so‘mdan oshgan fuqarolarning soliqlari soliq agentining to‘lov manbaida avtomatik hisoblanadi. Yo‘nalishsiz taksi faoliyati uchun taksi pasporti joriy etiladi.
