Yandex hujjatlar, taqdimotlar va havolalar bilan ishlash uchun neyroekspertni ishga tushirdi.
Hozirda u beta-versiya mavjud bo‘lib, undan Yandex’ning barcha foydalanuvchilari foydalanaishlari mumkin.
Neyroekspert hujjatlar mazmunini qayta hikoya qilish, olingan ma’lumotlardan xulosa chiqarish, ma’lumotlarni taqqoslash va belgilangan uslubda matnlar yaratish qobiliyatiga ega.
Xizmatdagi bilimlar bazalari bulutli omborlardagi papkalarga o‘xshash tarzda tuzilgan — ularga fayllarni joylash va keyin havola orqali ulashish mumkin. Bunday bir “papka"ga 25 tagacha turli formatdagi fayllarni yuklash imkoniyati mavjud.
Foydalanuvchi yuklangan ma’lumotlar haqida chat-bot bilan suhbatlashgandek dialog rejimida savollar berishi mumkin. Neyroekspert faqat foydalanuvchi taqdim etgan manbalar asosida javob tayyorlaydi va “o‘zidan” hech narsa qo‘shmaydi.
Kompaniya vakillari aytishicha, bu xizmat ham ish faoliyatida, ham kundalik hayotda foydali bo‘ladi. Masalan, o‘qituvchilar ma’ruzalardan bilimlar bazasini yaratishlari, o‘quvchilar esa imtihonlarga tayyorgarlik ko‘rishda ulardan kerakli ma’lumotlarni topishlari mumkin.
Shuningdek, neyroekspert sharhlar asosida mahsulotlarni taqqoslash va eng maqbul variantni tanlashda yordam beradi.
Kelajakda biznes uchun neyroekspertning qo‘shimcha funksiyalarga ega kengaytirilgan versiyasi taqdim etiladi.
Bu xizmat ichki bilimlar bazalaridan ma’lumotlarni qidirish, ishni tizimlashtirish, xodimlarning moslashuvini tezlashtirish va ularning samaradorligini oshirishga ko‘maklashadi.
Avvalroq Spot Yandex Market O‘zbekistonda apreldan rasman ishga tushirilishi rejalashtirilgani haqida yozgandi.
Marketpleys ikki oylik bepul muddatli to‘lovni taklif qiladi. Mahsulotlarni Toshkent bo‘ylab bir kun ichida yetkazib berish va’da qilinmoqda.
