Avvalroq 3−4 aprel kunlari Samarqandda “Markaziy Osiyo — Yevropa Ittifoqi” birinchi sammiti bo‘lib o‘tayotgani haqida xabar berilgandi. Unda Shavkat Mirziyoyev nutq so‘zlab, mintaqalar o‘rtasida sheriklik va hamkorlik bo‘yicha “to‘laqonli” bitim imzolashni taklif qildi.
Sammit yakuni bo‘yicha Markaziy Osiyo mamlakatlari va Yevropa Ittifoqi tomonidan qo‘shma deklaratsiya qabul qilindi. Xususan, hujjatda sanksiyalarni chetlab o‘tishga qarshi kurashish ikki tomonlama munosabatlarning “muhim jihati” ekanligi qayd etilgan.
Tomonlar Yevropa Ittifoqining umumiy yuqori ustuvor ro‘yxatiga kiritilgan sezgir tovarlar reeksportining oldini olish bo‘yicha hamkorlikni davom ettirishga kelishib oldilar.
Shuningdek, YI O‘zbekiston va Tojikiston bilan kengaytirilgan sheriklik va hamkorlik to‘g‘risidagi ikki tomonlama bitimlarni imzolashni, Qozog‘iston bilan esa ichki tartib-qoidalar yakunlangandan so‘ng viza rejimini soddalashtirish va readmissiya haqidagi ikkita kelishuv bo‘yicha muzokaralarni boshlashni maqsad qilmoqda.
Tomonlar sammitda muhim xom ashyo sohasidagi hamkorlikni yanada chuqurlashtirish va o‘zaro iqtisodiy barqarorlikni mustahkamlashga qaratilgan Niyatlar deklaratsiyasini qabul qildilar.
Markaziy Osiyo va Yevropa Ittifoqi Transkaspiy transport koridorini muvofiqlashtirish platformasini va O‘rta koridor bo‘ylab muhim infratuzilma loyihalarini qo‘llab-quvvatlashga kelishib oldilar, bu esa bozorlarga o‘zaro kirishni ta’minlaydi. Janubiy Kavkazdagi tinchlik va barqarorlik loyihaning muvaffaqiyatli amalga oshirilishiga zamin yaratadi.
Avvalroq Yevropa Ittifoqi Markaziy Osiyo uchun 12 mlrd yevrolik investitsiya paketini e’lon qilgani haqida xabar berilgandi.
