Turkiyaning Anadolu Isuzu Otomotiv Sanayii ve Ticaret A.Ş. avtomobilsozlik guruhi SamAuto avtomobil ishlab chiqaruvchisini xususiylashtirishni taklif qildi. Bu haqda kompaniya korporativ ma’lumotlarni ochiq e’lon qilish uchun mo‘ljallangan platformada ma’lum qildi.
Anadolu Isuzu Davlat aktivlarini boshqarish agentligiga SamAuto ustav kapitalidagi 75,2% davlat ulushini sotib olish bo‘yicha taklif bilan chiqdi.
Korxonalar va tashkilotlarning yagona davlat reyestri ma’lumotlariga ko‘ra, SamAuto’ning qolgan qismi teng ulushlarda Yaponiyaning ikkita Itochu Corporation va Isuzu Motors Ltd kompaniyalariga (12,4%dan) tegishli.
2024-yil 5-iyun kuni Anadolu Isuzu va Davaktiv SamAuto aksiyalarining nazorat paketini sotib olish imkoniyatlarini tahlil qilish va zarur o‘rganishlarni o‘tkazish uchun o‘zaro anglashuv memorandumini imzoladi.
O‘sha yilning 7-oktabr kuni Investitsiyalar, sanoat va savdo vaziri Laziz Qudratov Anadolu Isuzu prezidenti Bora Kochak bilan uchrashdi.
“Suhbat chog‘ida kompaniyani O‘zbekistonda xususiylashtirish davlat dasturida ishtirok etishga jalb qilish va avtomobilsozlik sohasidagi loyihalarni amalga oshirishning amaliy jihatlari muhokama qilindi,” — deyiladi xabarda.
Tomonlar, shuningdek, Anadolu Group xoldingining O‘zbekistondagi loyihalarining hozirgi holatini ko‘rib chiqdilar. Uchrashuv yakunida Investitsiyalar va tashqi savdo vazirligi rahbari hamkorlikni chuqurlashtirish va Turkiya kompaniyasining respublikadagi faoliyatini har tomonlama qo‘llab-quvvatlash choralarini ko‘rishga tayyorligini tasdiqladi.
23-yanvar kuni Laziz Qudratov Anadolu Isuzu kompaniyasining strategiya va biznesni rivojlantirish bo‘yicha direktori Ali Solihiy bilan muzokaralar o‘tkazdi.
Tomonlar O‘zbekistonda avtomobilsozlik va innovatsion texnologiyalarni joriy etish sohasidagi yuqori joriy qiymatga ega loyihalarni ko‘rib chiqdilar.
Anadolu Isuzu 1984-yilda tashkil etilgan, Turkiyaning Anadolu Group xoldingining sho‘ba korxonasi bo‘lib, avtobuslar va tijorat transporti sohasidagi eng yirik korxonalardan biri hisoblanadi.
Avvalroq Spot MAN va HOWO ishlab chiqaruvchisi Uz Truck and Bus Motors’ni xususiylashtirish boshlangani haqida yozgandi.
